Europe-ah Forest an inlan dawn ta

24th September, 2025

Nimin zing khan Birmingham Airport chu a lun hle a, hlim leh lawm takin Nottingham Forest ṭantute chu thlawhtheihna chhuah hun an nghak a, kum 30 chhung an nghah tawh European football an khelh leh dawn tak avangin an hlim hle.

Premier League season hmasa khan Nottingham hi an che ṭha, Champions League pawh an beisei hman hial - mahse, a tawpah Europa Conference League an tlin hram a, Crystal Palace zarah chanchin lawmawm an nei zui.

Palace hi FA Cup champion nih vanga Europa League khel tur an ni a, mahse, club-a share ngah ber John Textor-a'n Palace ang thoa Europa League khel tur Lyon-ah share a nei a, UEFA danah mi pakhat hnuaia awm club pahnihin inelna inang an hmachhawn a thiang lo.

UEFA chuan mahni ram league ve vea club pahnih dinhmun thlirin, league lama che chhe zawk Palace a paih thla a, Lyon-in Europa League an khel zui dawn thung.

Hetiang a nih tak avang hian ECL khel tura inruahman vek tawh Forest chu Europa League zawk khel tura tih an ni a, Palace hi ECL lamah an tla thla thung - Forest an vanneih phah a, zanin dar 12:30 hian an match hmasa atan Real Betis an lenchilh dawn a, an phur takzet.

Forest ṭantu pakhat Nigel chuan, "Kar hnih liam ta lekah khan chawlh hmangin Seville khawpuiah ka kal, mahse tunah ka kal nawn leh nghal dawn. A chhan chu European football kan khelh dawn vang a ni," a ti.

Real Betis hian European football-ah tawnhriat an nei ṭha angreng, an khelmual Villamarin Stadium pawh mi 70,000 ṭhut lenna a ni a, manager pawh Manuel Pellegrini a nih avangin hmachhawn a hautak dawn.

Kum 72 mi Pellegrini hian tun hmain Real Madrid a enkawl tawh - English team zingah pawh Manchester City leh West Ham lo enkawl tawhtu a nih avangin English football a hrechiang, an mikhual tur Forest tan pawh fimkhur a ngai dawn hle.

Forest hian manager thar Ange Postecoglou an neih hnuah chak ni hmel an la hmu lo. Season hmasa Europa League-ah khan Postecoglou hian Tottenham Hotspur a champion pui a, inelna hi a hrechiang - zaninah chak tum ngam chungin khualmualah an lut ang.