Korea Open-ah Prannoy

HS Prannoy chuan beiseina sang tak nen Korea Open Super 500 badminton tournament a khel dawn, tun kar chhunga khelh tur tournament-ah hian India rawlthar Ayush Shetty a inlan bawk ang.

Prannoy hian 2023 World Championship-ah khan bronze medal a lo vaw chhuak tawh a, tun season erawh chu result ṭha a nei hleithei lo - kum tawp hmain tun hi a tan insiamṭhat theihna hun a ni dawn.

Ayush hi kum 20 mi chauh a la ni a, season kal laiah Indian player zinga BWF title la thei awmchhun a nih avangin a lakah beisei a sang dawn - US Open champion kha a ni, a bul ṭan nan Chinese Taipei tlangval Su Li Yang a hmachhawn ang.

Hong Kong leh China Masters final lut thei, doubles player ṭha Satwiksairaj Rankireddy leh Chirag Shetty te an inlan dawn bawk a, anni pahnih hian champion turin theihna an nei, vanneihna an mamawh tel thung a ni.