Aizawl West Derby a hmuhnawm Kanan 'thar' vanduai, Dinthar nen inhnehtawk

GIG Motors MPL12 a hmuhnawm tulh tulh a, Aizawl West Derby pawh beisei ang ngeiin a nung ṭha a, goal ruk ngawt lutin Kanan leh Dinthar te 3-3 in an inhnehtawk. Kanan hian result an neih ṭhat tawk loh vangin coach atan Samson Ramengmawia an lalut a, an goal bawh na sawtin tlarhnung erawh a la phui lo.

Maimawms-in an intawn hmasak ṭumin 2-1 in Kanan an hneh a, MPL12 KickOff-ah Dinthar FC general secretary Johny Lalrinchhana chuan, "Engtiklai mahin min pha ngai dawn lo hrim hrim," tiin a sawi lawk. Dinthar GS thusawi dikna hi an inkhelh hmasak ṭumin dik mah se an inkhelh vawi hnihnaah erawh Kanan lamin ṭantu an ngah tawh zawk.

Coach thar nei Dinthar an phur a, bul pawh an ṭan ṭha. Minute hnihna lekah Kanan forward C. Lalnunsanga'n box pawn aṭangin goal kilah a pet lut nghal a, West Phaileng Dinthar tlangval Lansanga hian tun MPL-a a goal hmasa ber a khung. Mahse, minute li hnuah Dintharin corner kick aṭangin siphurh an sut a, Lalhmingthanga Sailo-in a tauh lut.

Inkhel a nung a, goal chance hmuh tur a tam a, mipui thawm pawh a ṭha. Armed Veng South tlangval J. Lalbiakliana (Valpuia) a ke vei lam ngei maiin goal kilah a pet lut a, Kanan mipuiin Valpuia theihna hmu a, a siamsaktu F. Lallawmkima pawhin fak a phu. Dintharin Joel B. Lalramchhana an kawl a, keeper ṭha hian Lalthanpuia leh Lawma te goal khung tur a zawn zatin a dang.

Kanan an phur a, entu mipui an pawr tel a, "Danmawi, i putar tawh," tih te chu an au duh dan a ni. Sialhawk Express theihna a la sang a, Kanan lamah freekick leh corner kick aṭangi ṭum hnih a tauh lut a, MPL best player hmasa ber au eltute an ngawi chiang hle.

First half-ah Dintharin 3-2 in hma an hruai leh ta zawk a, halftime-ah team pahnih an infuih ṭha a, second half pawh a la nung ṭha hle. Bench aṭanga rawn lut Serchhip tlangval Lalthuthlunga'n box pawn chiah aṭangin freekick mawi zetin a khung a, keeper Ramchhana a che lo. Minute 66-naah Kananin siphurh an sut a, a tawpah an vanduai zui.

Injury time-ah Dintharin corner kick an hmu a, outfield player-in halfway line an pel vek. Kanan midfielder Lalthlanawma leh forward Lalthanzuala ten ball an la chhuak a, Lungtlei tlangval pahnih hmaah Lunglei tlangval Ramchhana chauh ding tawh. TZ-a'n keeper bum thei lo mah se a per chu Thlanawma tan ball duhthusam a la ni a, goal ruakah midfielder ball pass thiam Thlanawma'n a pet lut thei lo - Kanan vanduai!

Coach Samson-a hnuaiah Kanan khelh danah hmasawnna hmuh tur a awm a, an hmabak erawh a awlsam dawn lo. October 3, Zirtawpni tlaiah Lawngtlaiah mualneitu MLS FC nen an inkhel dawn a, inkhel en châkawm bik a ni ang. Season bul ṭan ṭha Dinthar pawh semifinal khel turin an dinhmun a chiang ta bik lo a, Lawngtlaiah SYS FC an hmachhawn dawn a, table mawngphaha awm team hi an hneh ngei a ṭul ang.