Luis Enrique tan chawimawina pahnih

Paris St-Germain coach Luis Enrique-a'n Champions League-a la champion ngai lo PSG a champion pui a, treble nomawi a chawipui - a phu ang ngeiin coach ṭha bera puan a ni.

Mahse, Ballon d'Or sem zanah PSG-in league match khelh tur an neih avangin a hmunah Enrique a kal thei lo a, video kaltlanga a lawmthu sawina an pho chhuak thung.

Kum 55 mi coach hian Barcelona tan treble nomawi lo chawi tawh bawkin, Pep Guardiola nen club pahnih tana treble champion thei awmchhun an ni.

Enrique hian khelmualah chauh hna a thawk lo. Kum 2019-a cancer vanga thi, a fanu Xana hriatreng nana a din Xana Fundacion chuan Socrates Award an dawng.

Socrates Award hi football khawvela mi, midang tana luangchhuak ṭhinte hnenah hlan a ni a, Enrique hian Xana Fundacion hmang hian, naupang, natna ṭihbaiawm tak tak tuarte chu an pui ṭhin a ni.