Mizoram an vanduai

64th Edition Subroto Cup International Football Tournament 2025-ah Mizoram chuan nimin khan semifinal-ah Kerala an hmachhawn a, 1-0 a chak loin an vanduai. Kerala hian final-ah Army Boys COY hnehtu CBSE an hmachhawn ang.

Dr Ambedkar Stadium, Delhi-ah inelna hi neih a ni a, Mizoramin damlohna avangin an defender pawimawh Laldinthara an chhawr thei lo. Quarterfinal-a goal khungtu Benjamin Lalawmawma pawh kawṭha lo chungin an khelh luihtir a, inkhelh laia inthiarin, player 10-a khelh laite an nei hial.

Tlangnuam rawlthar Benjamin-a pawhin ṭum dang a pha lo a, an thlenna aṭanga stadium pan nan darkar khat leh a chanve chuang an thang avangin player-te an chau ve bawk. Heti chung hian Mizoramin bul an ṭan ṭha zawk a, hun tawpah erawh Laldinthara awm lohna Mizoram tlarhnung a phui tawk lo a, minute 61-naah Ashmil-a'n Kerala chakna goal a khung.

Inkhel hi minute 70 chhung khelh a ni a, hun tawp lamah Mizoram goal bawh a na tawk lo a, 1-0 a an chak loh avangin semifinal-ah an zinkawng a tawp.