Real leh Mbappe dang thei an awm lo

Season hmasa thleng kha chuan Real Madrid 'superstar' chu Vinicius Junior a ni a, tun season-ah erawh thawnthu a danglam ta - Kylian Mbappe chu a changtupa ber a ni a, Thawhlehni zan khan goal hnih a khung leh ta.

Real hian an mikhualna ramah Levante chu 4-1 in an sawp a, league match ruk an khelh tawhah an la chak vek - Madrid khaw club tan Kylian Mbappe-a'n goal hnih a khung bakah Vinicius Junior leh Franco Mastantuono ten goal khat ve ve an khung.

Levante tan Etta Eyong chuan goal khat a khung ve a, hetihlai hian Real-in goal hnih chiah la khung mah se, Mbappe-a'n penalty hmanga goal thumna a khung hnuah, minute 66-naah an goal lina hmangin chak a nemnghet.

Real-in hnehna an chan leh tak avangin La Liga table chung bera an dinhmun chu sawh nghehin a awm a, anmahni hnaih bertu Barcelona aiin point ngain an sang zawk mek - Catalan club hi match khatin an khel tlem zawk thung.

Hello Vini

Season hmasa khan Vinicius Jr-a'n Ballon d'Or dawn a beisei a, mahse, a beisei angin a dawng lo. Real Madrid pumpuiin an thinrim pui a, Paris khawpuia football award ropui ber semna hi an chhim duh lo.

Vini-a'n a hnu lawkah,"A ṭul a nih chuan vawi 10 chuang pawh ka tinawn mai ang," tiin Ballon d'Or dawng tura theihtawp a chhuah chhunzawm tur thu a sawi a, mahse, Thawhṭanni zana Ballon d'Or dawngtu puannaah 16-na a ni!

Mi tam takin fiamthu thawh nan Vini an hmang a, mahse, khelmualah amah sawiseltute a chhang - Real tan minute 28-naah goal mawi bik a khung a, forward class tak a la ni reng tih a pholang.

Vini hian minute 38-naah Mastantuono khung tur a siamsak zui a, kum 18 mi winger finishing a tawih takzet - tun nipuia River Plater aṭanga Real Madrid pantu Mastantuono tan Real jersey nena goal a khung hmasak ber a ni.

A tawpah Mbappe

Real-in 2-0 a hma an hruai hnuah Levante tan Etta Eyong chuan si phurh sut ṭhenna goal a tauh lut a, 2-1 a ni. Mahse, Levante beiseina neih chhung a rei lo a, Mbappe a inlar.

French striker hian minute 64-naah 'Panenka' hmanga penalty petin, Real hi 3-1 in hma a hruai nawnpui a, a hnu minute hnih hnu lawkah a belhchhah leh bawk - mualneitu team tan thawhlehna chance a awm tawh lo.

Mbappe hian tun season-a match sarih a khelh tawhah goal kua a khung tling ta der a, assist vawi khat a nei bawk. Club World Cup nena chhiar tel chuan match 10-ah goal 10 a khung leh der tawh - September chauh a la ni!

Hetihlai hian Real boss Xabi Alonso pawh Madrid coach ni tawh zinga league match hmasa paruka chak vek thei pahnihna a ni a, Inrinni zan Madrid derby-ah Atletico an hneh a nih chuan, vawi sarih chak zawn thei Vanderlei Luxemburgo record a nih rual ang.