Lincoln laka vanneihna mamawh Chelsea

Club World Cup nomawi chawi a, 'world champion' tih ngata insawi ṭhin Chelsea-in League One clun Lincoln City laka chak turin vanneihna an mamawh a, League Cup third round-ah 2-1 in an chak hram.

Mi 10,000 chuang awrh lenna LNER Stadium-ah Lincoln hian Rob Street hmangin goal hmahruai an khung hial a, mahse, Tyrique George leh Facundo Buonanotte ten khung ve lehin, 2-1 in Blues an chak a, an tlang.

Chelsea hian League Cup an khelh hma hian September-ah chak an la nei lo - Brentford (2-2) an draw hnuah Bayern Munich (3-1) leh Manchester United (2-1) ngam loin an tlawm a, an 'puja' fuh loh lai tak a ni.

Thawhlehni zan inkhelah pawh Blues tlarhnung a nghing a, English third division club lakah an talbuai hle! Hrem vanga inlan thei lo Robert Sanchez aia si ban nghahtir Filip Jorgensen a rintlak lo a, a bik takin ball kangah a talbuai ṭhin hle.

Lincoln tan Chelsea fan Freddie Draper-a'n goal hmahruai khungna remchang a nei a, hei pawh Jorgensen-a chet fuh tawk loh zar a ni a, mahse, Blues an vannei.

Hetihrual hian Chelsea tan vanneih reng theih bik a ni lo a, minute 42-naah goal an chhuah ta nge nge. Blues tan captain Enzo Fernandez a chesual a, a ball pek muang zet chu Ivan Varfolomeev-a'n nangchingin, Rob Street tan a siamsak.

Kum 23 mi striker hian harsatna nei loin goal-ah a chantir a, Enzo Maresca naute an hawihai. Mahse, second half ṭan aṭanga minute thumnaah Tyrique George a inlar a, kum 19 mi forward hian si phurh sutna goal a khung.

Blues academy chhuak forward hian a duhtawk mai lo. Facundo Buonanotte khung tur a siamsak a, Argentine midfielder hian harsatna nei loa goal-ah lo chantirin, 2-1 in Blues an chak hram.

Mahse, London club hi third division club laka harsa taka an chak avangin inenfiah an la mamawh reng a, Inrinni zan dar 7:30-a Brighton & Hove Albion an mikhual hunah chuan an insiamṭhat a ṭul ang.