Insiksawi mek Villa mualah Bologna

Tun hnai khan Aston Villa president of football operation Monchi a bang a, a hmun ruak luah turin Real Sociedad sporting director Roberto Olabe chu lak a ni - Villa an insiksawi vel mek lai hian Bologna an mikhual zawn.

Zanin dar 12:30 hian Unai Emery enkawl Aston Villa hian Europa League khel turin Italian club hi an lo mikhual dawn a, season hmasa pawh khan Champions League-ah an lo inhmachhawn tawh - Villa hian 2-0 in hnehna an chang.

Villa hian season bul an ṭan fuh lo takzet - Premier League match vawi nga an khelh tawh chinah chak ni hmel an la hmu lo; point thum chauh la hmuin tlahniam thei chinah an ding mek, an dinhmun a ṭha lo hle.

An khelh ṭhat loh avangin a chhan an zawng a, president of football operation Monchi hian mawhphurtua inngaiin a hna a bansan - a nihna sang tak hi chawlhsan rih mah se club tana thurawn petu erawh a la ni chhunzawm dawn tho.

Villa chairman Nassef Sawiris chuan, "Aston Villa tana a hnathawh zawng zawng avangin Monchi chungah lawmthu ka sawi. Season thum chhung chu a zawnin European football kan khel theih phah hial.

"European football kan khel a ni satliah lo a, season hmasa phei kha chuan Champions League quarterfinal kan thleng hial, a hnathawhte hi theihnghilh chi a ni tawh lo ang.

"Tunah chuan, Roberto hun a inṭan ve leh thung tawh dawn. Ani hi player theihna nei hmu thiam leh lak thiam a ni a, hmasawn kan ngaihna lai ṭhenkhat pawh a hre chhuak thei ngei turah ka ngai," tiin a sawi.

Monchi leh Unai Emery te an inkawp rem thei hle a, kum Europa Conference League semifinal an lut a, hemi ṭum hian Premier League-ah palina niin, UCL khel turin an tling bawk - season hmasa hian Paris Saint Germain hneh loin an tla.

Spanish manager Emery leh Roberto ten hna an thawk dun ṭan dawn a ni a, eng ang takin nge hma an lak dawn tih chu hriat la ni lo mah se club chhungah boruak erawh a awm tih a chiang tawh a, khelmualah nghawng neih tir nghal an duh ang.

Season hmasa lama an intawn tawhna chhut chuan Aston Villa hi tun ṭumah pawh hian an buk a rit zawk a rinawm a, season bul an ṭan fuh tawk lohna boruak siam ṭhat theihna remchang a nih ngei pawh a rinawm.