Kum vangin Yamal an en kân - La Liga President

La Liga president Javier Tebas chuan Lamine Yamal-a'n Ballon d'Or a dawn loh chhan chu, a kum naupan vang mai nia a hriat thu a sawi a, Barcelona forward chuan khawvela footballer ṭha ber award hi a phu hle niah a ngai.

Tebas chuan, "Kum 23 aia upa ni se chuan, award kha a dawng em em ang. A kum a la nau deuh avangin Kopa Trophy zawk an pe ta mai a ni," a ti - Yamal hian kum 21 hnuai lam footballer-in an dawn ṭhin Kopa hi a kum zawnin a dawng a, he award hi vawi hnih dawng thei hmasa ber a ni.

Kum 18 mi Yamal hian season hman zawh takah khan Barcelona tan inelna hrang hrangah match 55 khelin goal 18 a khung a, assist vawi 25 a nei tel bawk. Tebas chuan, "Yamal hian tun anga a khel reng a nih chuan Ballon d'Or hi a la dawng khawp ang," a ti zui.

Ballon d'Or hi Thawhṭanni zan khan Paris khawpuiah sem a ni a, Paris Saint-Germain forward Ousmane Dembele chuan French club hi season hman zawh takah khan treble champion nihpuiin, he award hi a dawng.

Barcelona president Joan Laporta erawhin Yamal-a award dawng lo a hrethiam a, Catalan club hotupa chuan, "Ka ngaihdanah chuan Champions League nomawi chawi hian buk a tirit em a ni," a ti a, UCL an chawi loh avanga Yamal chuan dawng loah a ngai.

Hansi Flick-a enkawl Barca hian season hman zawh takah khan La Liga, Copa del Rey leh Spanish Super Cup-ah champion nomawi an chawi a, Yamal bakah hian Raphinha leh Pedri te chu Ballon d'Or dawng thei tura chhawp zingah an tel.

Hetihlai hian Yamal-a pa Mounir Nasraou chuan Ballon d'Or award a fapain a dawng lo chu a sawisel a, "Chanvo inruksakna emaw inlaksakna emaw ka ti lo ang - mahse, hei lo liama thil thleng tur pangngai tih khawbaw zona hi a awm lo.

"Ka ngaihdanah chuan Lamine Yamal hi tum tluk rual lohin, khawvela footballer ṭha ber a ni," a ti a, Dembele-a'n dawn a phu titu erawh an tam zawk ang.

Barcelona hian zanin dar 1:00-ah league match khel turin Real Oviedo an lenchilh dawn a, hetihrual hian hliam vanga an match hnuhnung pathuma inlan tawh lo Yamal erawh a inlan theih a la rinawm chiah lo.