Inter Village Volleyball: Hming pek theih hun hnuhnung

Mizoram Volleyball Association (MVA) buatsaihin khua/veng inelna Inter VC/LC Volleyball Tournament 2025 khel tur tan vawiin hi hming pek luh theih hun hnuhnung a ni a, nimin thleng khan mipa team 37 leh hmeichhe team paruk an inziak lut tawh a ni.

Ruahman dan chuan, inelna hi Ocotober 1-10 chhungin R. Dengṭhuama Indoor Stadium, Mualpuiah khelh tur a ni dawn a, tel tum tan September 25, Ningani thleng hming pek luh theih a ni.

Player-ten an vote neihna hmunah an khel tur a ni dawn a, vote la nei lote chu aadhaar hmanga endik tur an ni ang. Inkhelh hun apiangin ID/aadhaar card ken zel tur a ni a, keng lo tan khelh theih a ni dawn lo - vote neihna hi January 1, 2025 hnu lama sawnte pawm a ni dawn lo bawk.

Squad-ah player 20 ziah luh theih a ni a, inkhelh dawnah mi 12 zel ziah luh theih a ni thung ang a, tournament hi best of 5 hmanga khelh tur niin knockout hmanga inel tur a ni ang.

MVA bakah a hnuaia district leh zone ten an hrem lai player an inlan thei dawn lo a, khingpui tur team lamah player sawisel (complain) duh nei tan inkhelh hmain sawisel theih a ni dawn, inkhelh hnuah erawh sawisel a rem dawn lo.

Inkhel zawng zawng chu MVA YouTube leh LPS-ah live-a tihchhuah tur a ni.