Madueke a chawl rih dawn

Arsenal forward Noni Madueke chu khup hliam vangin a inkhel thei dawn rih lo, hliam vanga a chawlh chen tur hi sawi chian theih ni lo mah se chawlhkar ruk aṭanga kar riat chhung vel chawl tura ngaih a ni.

Kar tawp Premier League inkhelah Arsenal hi Manchester City nen 1-1 in an inhnehtawk, hemi ṭum hian chawlhlawk laiin Madueke hi thlak a ni a, damkawr Bukayo Saka chu khelmualah a lut ve thung.

Nipui bazar lai khan Madueke hian Chelsea aṭangin Arsenal hi a zawm - Gunners thiampuipa Saka a inhlam avangin inkhelhna hmun pawh a chang chho nghal, tunah erawh inenkawl a ngai leh rih ta zawk.

Arsenal manager Mikel Arteta chuan, "A chawlh chen tur tak ka la sawi thei lo, endik nawn leh a la ngai dawn. Duhthusamah chuan a rang thei ang berin lo inkhel leh thei se la tih hi a ni. Kan tan chuan Madueke hi a pawimawh," a ti.

North London club tan chauh ni loin England tan pawh chânna a ni dawn. Three Lions coach Thomas Tuchel-a'n Madueke hi a hman duh zinga mi a ni a, tuna a lan dan chuan Wales leh Latvia a hmachhawn thei dawn lo - November laihawla Serbia leh Albania nen an intum tur atan pawh a dinhmun a chiang lo a ni.