India-in Asia Cup final an lut

Asia Cup-ah India-in harsatna nei loin final an lut. Surya Kumar Yadav captain-na hnuaia khel Men in Blue hian Nilaini zan khan Bangladesh chu 41 runs-in an hneh a, tun inelnaah an khingpui an la hneh vek. Super Four bikah hian India hian Bangladesh hmain Pakistan an hneh tawh a, zanin dar 8:00 hian Super Four match hnuhnung berah besei tur nei tawh lo Sri Lanka nen an inkhel ang.

Dubai-a inkhelah ṭhumvawrah Bangladesh an vannei a, vawm hmasak an thlang. India tan Abhishek Sharma bawk a rawn che ṭha a, ball 37 lekah 75 runs a siam. Kum 25 mi Abishek hi Amritsar-a piang a ni a, ISL-ah Delhi Daredevils leh Sunrisers Hyderabad tan a khel tawh. Nikum July thla aṭang khan ram tan T20 khel ṭanin Zimbabwe (100) leh England lakah century a siam tawh a, tunah hian ICC ranking-ah pakhatna a ni mek.

Asia Cup-ah Abhishek hian match ngaah 248 runs a siam tawh a, chawhrualin 49.60 runs siam ang niin a strike rate pawh 206.66 a ni pha daih. India batter dangte an che ṭha tawk lo a, Hardik Pandya-a'n 38 runs a rawn siam ve zarah 168/6 runs an siam.

Bangladesh opener Saif Hassan-a'n bul a ṭan ṭha a, 69 runs siam mah se thlawptu a nei lo. India bowler ṭha Jasprit Bumrah a che ṭha tawh a, Hassan a vawm out tiamin wicket hnih a la. Kuldeep Yadav-a'n wicket thum lain 18 runs a pe a, Uttar Pradesh bowler hian tun inelnaah wicket 12 la tawhin wicket a la hnem ber. Bangladesh hian 127 runs siamin an thi fai vek a, India hi 41 runs-in an chak.

India-in final an lut a, nizana Pakistan leh Bangladesh inkhela chak zawk an hmachhawn ang. Final hi September 28, Pathianni zan dar 8:00-ah khelh tur a ni a, cricket ngainatute chuan India leh Pakistan bawk an hmu châk ang.