MPL en man Rs 50 leh Rs 500

GIG Motors MPL12 round 10 chu CYLA Ground, Lawngtlaiah October 2-3, 2025 hian khelh a ni dawn. Lawngtlai mipui an vannei a, fixtures ṭha an chan avangin entu mipui ṭhahnem tak an punkhawm ngei beisei a ni.

Inkhel en man hi Rs 50 leh Rs 500 a ni dawn a, a zawrh hna hi an ṭan daih tawh. Lawngtlaia zin ve thei lo tan Zonet Rihnim, Empai leh YouTube (member only) hmangin a en theih ang.

Mizoram Police FC leh Saikhamakawn FC ten match hmasa ber an khel dawn a, Lawngtlai mipui tan Mizo footballer langsar Malsawmfela, R. Malsawmtluanga, F. Lalrinpuia, Lalfakzuala, Lalbiakhlua (Biaktea) leh F. Lalmuanawma te hmuhna hun remchang a ni ang.

Neutral ṭantute tan I League club pahnih Aizawl FC leh Chanmari FC inkhel chu en châkawm ber tur a ni dawn a; October 2, Ningani tlai dar 3:00-ah khelh a ni dawn. Office/school chawlh a nih dawn avangin tualchhung mipui tan pawh inkhel en a remchang dawn.

October 3, Zirtawpni chhunah MPL champion hmasa ber Dinthar FC leh SYS FC te an inkhel dawn a, hei hi Lawngtlai mipui chuan MLS FC leh Kanan FC inkhel nghahna inkhel tiin an sawi ngei ang. Lawngtlai mipui en châk ber tur an khaw club MLS an ni a, semifinal luh beiseina an neih avangin ṭawiawm pawh an châkawm dawn. Chutihrualin Kanan FC hian result ṭha duhin coach atan Samon Ramengmawia an lalut a, an khaw tual ngeia MLS hneh chu an tum ber tur a ni.