Inter Miami-in playoff khel dawn

Nimin zing khan Inter Miami tan Lionel Messi-a'n goal hnih a khung a, New York City FC 4-0 in an sawp. Miami hian match 29 aṭangin point 55 an hmu a, pathumna niin playoff khel turin an tling chiang.

Citi Field, New York-ah mualneituin bul ṭan ṭha mah se chance ṭha an hlah nasa. Inter Miami tan Baltasar Rodríguez-a'n first half tawp hma hretin Lionel Messi siam chu a khung a, halftime-ah 1-0 a ni.

Second half-ah Messi a rawn inlar a, minute 74-naah Sergio Busquets-a through ball um lutin 'cool' takin a pet lut. Minute 83-naah Rodrigo De Paul penalty hlawhchhuah chu Luis Suarez-a'n a khung a, minute thum hnuah Messi-a'n chak nemnghehna goal a khung.

Kum 38 mi Messi hian tun season-ah goal 32 a khung tling tawh a, MLS bikah match 23 aṭanga goal 24 khungin top scorer a ni mek. Inter Miami hi Javier Mascherano enkawl an ni a, Barca star hlui Messi, Busquets, Suarez leh Jordi Alba bakah Atletico Madrid player hlui Rodrigo De Paul te an kawl avangin MLS Supporters' Shield leh MLS Cup an chawi kawp a nih pawhin thil mak a ni lo ang.