Champion lai Newcastle an chak

League Cup champion lai Newcastle United chuan nomawi humhim tumin kawng dik an zawh zel a, Nilaini zan khan third round inkhelah Bradford City chu 4-1 in an hneh.

Magpies tan Joelinton leh William Osula ten goal hnih ve ve an khung a, Bradford tan substitute Andy Cook chuan goal khat khung ve bawk mah se, mualpho zualpui khuhna chauh a ni.

Hetihrual hian Cook tan erawh zan chhinchhiah tlak bik a ni. Kum 34 mi striker hi Newcastle fan ruhkawl a ni a, Alan Shearer ngaisang em em chunga seilian a ni.

Magpies tana khel tur khawpin thleng sang lo mah se, a club ṭan em em a hmachhawn a, goal a khung zui - chak zo lo mah se, January-a a khup hliam vanga chawl reng, tun hnaia lo kir leh ta Cook chuan he zan hi a hre reng tawh ang.

Newcastle United hian September 28, Pathianni zanah league match a khel zui dawn a, Arsenal an mikhual dawn - tun season-a league match nga khelh tawha vawi khat chiah la chak Magpies tan Doncaster hneh hi Gunners hmachhawn tura inbuatsaihna ṭha tak a ni.