Carabao Cup-a Liverpool tawn tur Palace

English football inelna Carabao Cup third round khelh zawh a ni ta a, League Cup tia hriat lar zawk inelna fourth round-a inhmachhawn tur pawh a hriat ta.

Premier League champion Liverpool chuan Crystal Palace an hmachhawn dawn a, duh thlang thei ni se, FA Cup champion Palace aia nem zawk hmachhawn an châk ang!

Reds hian Community Shield-ah khan Palace hi an lo hmachhawn tawh a, 2-2 a an inhnehtawk hnuin, penalty-ah 3-2 in an ngam lo - League Cup-ah phuba lakna remchang an nei dawn.

Hetihrual hian club pahnih hi League Cup-a an intawn hmain, September 27, Inrinni zanah league match khel turin an intawng dawn a, Palace khelmualah a ni ang.

Nipui transfer-ah Reds hian Palace chhuanvawr Marc Guehi an la lut hman ṭep a, Palace-in an phal leh lo - club pahnih inkara thil thleng vel avangin inkhelin ngaihven a hlawh dawn.

Arsenal pawhin Brighton & Hove Albion an tawng dawn a, Newcastle United leh Tottenham Hotspur inkhel tur pawhin ngaihven a hlawh ang.

Manchester City tan Swansea City hmachhawn chu thil harsa a ni lo tura ngaih a ni a, Chelsea-in khualmualah Wolverhampton Wanderers an lenchilh dawn thung.