Spurs an chak nuamsa

League Cup third round-ah Tottenham Hotspur chuan 3-0 in Doncaster Rovers an hneh a, nuamsain hnehna an chang - Inrinni zana league match-a Wolverhampton Wanderers an mikhual hun atan an inpuahchah ṭha hle.

Spurs hian an league match hnuhnung berah Brighton & Hove Albion chu 2-2 in an inhnehtawkpui a, coach Thomas Frank-a'n kha inkhela bul ṭan aṭangin player pasarih ngawt a siksawi.

Mahse, League One club laka hnehna chang turin Spurs-in harsatna an tawk lo a, inkhel ṭantir lam minute thum chhungin Mathys Tel chuan goal khungna remchang vawi hnih ngawt a nei hman!

Mahse, Tel vanneih zan a ni lo a, goal a khung lo. Spurs hian goal khung tur erawhin an nghah rei a ngai lo. Bayern Munich aṭanga loan-a an hawh Joao Palhinha chuan corner aṭanga ball kal chu minute 14-naah overhead kick hmangin a khung.

Minute thum hnuah Spurs hian an khung belh zui - Wilson Odobert-a cross chu Doncaster defender Jay McGrath chuan an lamah a tilut a, Brennan Johnson chuan hun pek belhah chakna a nemnghet bawk - Lucas Bergvall goal khung chu offside vangin an pawm lo mah mah!