A pangngaiin kan tlan ang - Marquez

Marc Marquez-a'n MotoGP champion ni turin point thum chauh a mamawh tawh a, tun kar tawpa intlansiak an neih hunah danglam taka chet a tum lem lo, season an hman dang pangngai anga tlan mai an tum.

Bike intlansiakna sang ber season hman laiah hian vawi 22 tlan tur a ni a, tlan hmabak paruk la nei mah se Marquez hi a dinhmun a ṭha tawh hle, point thum a hmuh belh a nih chuan amah hnaih bertu Alex Marquez tan umphak theih a ni dawn tawh lo.

Point 512 hmu chunga hmahruai mektu Marquez chuan, "Twin Ring Motegi-ah thil danglam tak thlen tir kher kan tum dawn lo, hmun danga kan chet ṭhin dan pangngai bawkin kan che ang.

"Intlansiak hmabak kan la nei nual a, heng hoah hian vanduai chuan chetsual vek theih a ni. Engmah hi chiangsa anga sawi theih a la ni lo, chutihrualin inrintawkna sang tak neih theihtawp kan chhuah dawn a ni," tiin a sawi.

Spanish rider hi a champion leh a nih chuan, bike intlansiakna sang berah hian champion tam ber Valentino Rossi (7 titles) a nih rual dawn tawh a, a tan hun chhinchhiah tlak bik a ni ngei ang.

Kum 32 mi chauh a la nih avangin Marquez hian hmabak a la ngah viau bawk a, kuminah hian a champion fel hma a nih chuan season thar atan rilru a seng ṭan hma thei dawn tihna a ni a, point hmu tam record siam a tum tel bawkin a rinawm.