Setien-a enkawl Barcelona chak lo

Barcelona chuan an manager thar Quique Setien hnuaia a vawi khat nan an chak lo a, Inrinni zan khan Mestalla Stadium-ah Valencia 2-0 in an hneh lo. Barca hian Ernesto Valverde an ban hnuah Granada (1-0) leh Ibiza (2-1) te hneh tawh mah se an khelh dan leh an result thlirin Setien-a hnuaiah hmasawnna hmuh tur a la awm lo.

Valencia forward Maxi Gomez-a'n first half-ah penalty a hlah a, Barca keeper Marc-Andre ter Stegen-a'n La Liga bika penalty a dan hmasak ber a ni. Uruguayan forward Gomez hian first half-a a hming chhiatna thupin minute 48-naah goal hmahruai a khung a, minute 77-naah chak nemnghehna goal a khung leh bawk.

Keeper Ter Stegen a khel ṭha chungin Barcelona-in goal hnih an chhuah a, hun tawp hnaiha Arsenal defender hlui Gabriel Paulista goal khung pawm a nih loh zarah Catalan club mualphona a ziaawm. Barcelona innghahna Lionel Messi-a'n mawhphurhna lain goal attempt vawi 11 zet nei mah se goal-ah a khung lo a, Argentine forward hian Antoine Griezmann tan vawi khat chauh a siamsak bawk. Nizan khan Real Madrid-in Real Valladolid an hmachhawn a, Los Blancos hian hnehna an chang a nih chuan ni 100 hnua a vawi khat nan La Liga hmahruaitu an ni ang.