MSL chungchangah MBBA leh Zonet te an inrem

Mizoram Basketball Association leh Zonet chuan Mizoram chhunga basketball inelna sang ber Mizoram Super League season thum dang buatsaih leh turin nimin khan inremna an ziak. MBBA leh Zonet ṭangkawp hian hlawhtling takin MSL season 10 chhung an kalpui tawh a, Zonet hian MFA nen ṭangkawpin Mizoram chhunga football inelna sang ber Mizoram Premier League season 12-na an buatsaih mek bawk.

Zarkawta Zonet office-ah inremna hi ziah a ni a, Zonet director LV Lalthantluanga leh MBBA president R. Lalnunpuia ten hming an ziak a ni. Season 11 aṭanga season 13-na thleng buatsaih ho turin inremna hi an ziak a, Zonet hian season 11-na buatsaih atan Rs 13,00,000 an tum ang.

Season tinin cheng nuai khatin a pung ang a, Zonet-in MSL 12-naah Rs 14,00,000 an tum ang a, MSL13-ah Rs 15,00,000 an tum thung dnaw. Chutihrualin Zonet hian hian MSL commercial rights zawng zawng a nei ve thung a nga, sponsor awm te chu an hnenah a lut ṭhin dawn a ni.

MSL buatsaihtu MSL Board din ṭhin a ni ang a, chu Board-ah chuan Zonet leh MBBA aiawh ve ve te an awm ang a, sum hman dan tur pawh MSL Board hian a rel dawn. Basketball technical kaihhnawih thil reng reng chu MBBA kutah a awm ang a, Zonet hian a TV leh Digital network ah MSL hi en theihin a pe chhuak dawn bawk a ni. MBBA leh Zonet te hian he inremna season thum a tawp hunah an inremna hi ennawnin thawhho dan an sawiho leh ang.

MSL hnuhnung berah Zarkawt BCA an champion a, Mizoram chhung basketball inelna sang berah hian Zarkawt club hi vawi ruk an champion tawh. An elpui Khatla TBL-in vawi thum nomawi an chawi tawhin Mission Veng Vikings vawi khat an chamjpion ve tawh bawk.

Inelna ṭantirh lamah MSL hi Hawla Indoor Stadium-ah neih a ni a, MSL3 aṭangin entu len tam zawkna R. Dengṭhuama Stadium, Mualpuiah khelh ṭhin a ni.