Inter Village Volleyball: Team 78 an inlan dawn tih a chiang ta

Mizoram Volleyball Association (MVA) buatsaihin - Inter VC/LC Volleyball Tournament 2025 khel tura hming pek hun chu khar a ni a, mipa team 64 leh hmeichhe team 14 te an inlan dawn, team tel zawng zawng hi 78 an ni ang.

Ruahman dan chuan, inelna hi Ocotober 1-10 chhungin R. Denghuama Indoor Stadium, Mualpuiah khelh tur a ni dawn a, chhunah an inkhel hin ang. Inkhel zawng zawng hi MVA YouTube leh LPS-ah live a tihchhuah tur a ni.

Player-ten an vote neihna hmunah an khel dawn a, vote la nei lo te chu aadhaar hmanga endik tur an ni ang. Inkhelh hun apiangin ID/aadhaar card ken zel tur a ni a, keng lo tan khelh theih a ni dawn lo - vote neihna hi kum 2025 January 1 hnu lama sawn te pawm a ni dawn lo bawk.

Squad-ah player 20 ziah luh theih a ni a, inkhelh dawnah mi 12 zel ziah luh theih a ni thung ang a, tournament hi best of 5 hmanga khelh tur niin knockout hmanga inel tur a ni ang.

MVA bakah a hnuaia district leh zone ten an hrem lai player an inlan thei dawn lo a, khingpui tur team lamah player sawisel (complain) duh nei tan inkhelh hmain sawisel theih a ni dawn, inkhelh hnuah erawh sawisel a rem dawn lo.