Atletico khelmualah Real Madrid

Real Madrid-in tun season-a league match ruk an khelh tawhah hnehna an la chang vek a, zanin dar 7:30 hian hmelma kumhlun Atletico Madrid chu khualmualah an lenchilh dawn.

Atletico Madrid erawh season an hmang chhe takzet a, table-ah pakuana an ni mek! Nipui transfer-a an sum hman nena thlir chuan a awihawm lo hial zawk - league match ruk an khelh tawhah vawi hnih chiah an la chak.

Mahse, Madrid derby a nih miau avangin Atletico hi zuam ngawt chi an ni lo a, Diego Simeone-a'n an hmelma kumhlun laka tlawm a duh dawn lo - Madrid derby a hmuhnawm dawn.

A hunah tak

Atletico season hman chhiatzia kan sawi rualin, Real an mikhual hmain an league match hnuhnung berah an insiamṭha hman a, Rayo Vallecano chu 3-2 in an hneh.

Simeone-a team tan Julian Alvarez chuan hattrick a siam a, Argentine striker hian buaipui tham a nihzia a pholang leh ta - zaninah pawh Real tlarhnung tan Alvarez ven bik a sual lo ang.

Atletico fixture a hautak avangin Simeone-a'n a squad a siksawi reng a, Rayo lakah pawh khan bul a ṭantir regular pahnih Nico González leh Giuliano Simeone te chu bench-ah a dah - zaninah chuan bul an ṭan tawh ang.

Hmabak record

Kum 2005 khan Real Madrid coach Vanderlei Luxemburgo chuan a league match hmasa pasarihah Real a chakpui a, Real coach zinga league match hmasa pasariha chak vek thei awmchhun a la ni reng - zaninah Xabi Alonso-a'n nih rual theihna chance a nei dawn.

Khatihlai kha Real-in Zinedine Zidane, Ronaldo, Roberto Carlos leh Raúl te ho an kawl lai a ni a, mahse, "A bul ṭan ṭhat chu a zahve zo ang a a ni," tih chu dawt mai an chantir a, kha season-ah khan eng nomawi mah an chawi lo!

Hei vang hian Alonso pawhin chesual thei reng a la ni tih a inhrechiang ang tih a chiang a, a bik takin Atletico hian ngamtu la nei lo ṭhenawm club hi lo hneh an châk em em dawn tih a chiang.

A bul ṭanna

Real-in season bul ṭan ṭha viau mah se, Alonso hi a la ṭawng fimkhur rih hle. Real boss chuan, "Tunah chuan team ṭhang lai kan ni a, kan la insiamrem mek chauh a ni. Ka player-te nen hian ni 51 chiah kan la thawk ho a, hmabak tam tak a la awm.

"La Liga, Champions League leh Copa del Rey-ah te ṭha taka khel turin team kan din mek a ni," a ti a, a ṭawng uang duh lo - he team hian tlarhmaah Kylian Mbappé, Vinicius Junior, Rodrygo leh Franco Mastantuono te ho an nei.

Mbappe-a'n season duhawm tak hmangin, Real-ah a changtupa ber a ni tih a pholang mek a, tun season inelna hrang hrangah match sarih khelin goal kua a khung leh der tawh - zaninah pawh ani danchah hi a pawimawh ang.