Isak a la inpeih lo - Arne Slot
Liverpool manager Arne Slot chuan a striker Alexander Isak chu minute 90 inkhel tura a la inpeih loh thu a sawi a, a striker pakhat zawk Hugo Ekitike hrem ni mah se, Liverpool striker hi zanin dar 7:30-a Crystal Palace an lenchilh hunah minute 90 tluan chu a khel dawn lo niin a lang.
Slot chuan, "Isak hi a inkhel leh thei ang tih ka ring a, chutihrual chuan minute 90 khel tur chuan a game kal dan kan thlir uluk a ngai. A tan chuan match pumpui khelh hi chu a la rit lutuk deuh mai thei a ni," a ti a, Swede striker chu fimkhur taka chhawr zel a tum tih a sawi.
Pound maktaduai 125 man Isak hian League Cup-ah khan Reds tan inkhel bul ṭanin, Southampton a hmachhawn a, Liverpool a pan hnua a goal hmasa ber a khung.
Mahse, he inkhelah hian Liverpool tan chanchin lawmawm lo pahnih a awm a, striker Hugo Ekitike chuan red card a hmu a, Reds tana a match hmasa ber kheltu Giovanni Leoni chu hliam vangin lakchhuah a ngai bawk.
Slot chuan Ekitike chungchang sawi chhuakin, "A chet dan kha thil finthlak lo tak a ni a, amah pawhin a tihsual hriain, a ṭhiante hnenah ngaihdam a dil nghal a ni. Player naupang tak a la ni a, midang ang thoin a tisual ve a ni mai.
"He club-ah hi chuan tihsual vanga sum inchawitir nghal ngawt kan tingai lo," a ti a, French striker chu a chet dan avanga pawisa an chawitir anga sawi chu a pha.
Hetihrual hian hliam vanga lakchhuah Leoni chu kum khat tal a chawlh tur thu a sawi bawk a, Reds hian centre back Virgil van Dijk, Ibrahima Konate leh Joe Gomez chiah an nei tihna a ni!
Nipui transfer-ah khan Marc Guehi chu Palace aṭanga la lut turin an inrem vek tawh a, mahse, medical nei tura inbuatsaih vek tawh hnuah Palace lamin an phal leh lo.
Slot chuan, "Palace player a ni a, a chungchang sawi ka tum lo. Team ṭha tak kan tum dawn a, ṭha taka kan inbuatsaih a ngai a ni," a ti a, Guehi chungchang a sawi duh lo.
Palace hian Community Shield-ah khan penalty-in Liverpool hi an lo hneh tawh a, Guehi chungchangah boruak a awm leh hat bawk - hei vang hian zanin inkhel tur hian ngaihven a hlawh lehzual ang.