City aia harsa tur an awm chuang lo - Parker

Zanin dar 7:30 hian Manchester City-in Etihad Stadium-ah Burnley an mikhual dawn. Pep Guardiola hoten season bul ṭan ṭha tawk lo mah se internatonal break hnuah an rawn insiamṭha a, champion nomawi laklet ngei an tum tih an khelh dan hmangin an pholang.

Burnley manager Scott Parker chuan, "Premier League club hrang hrang thlir ila, City aia harsa tur an awm chuang lo. Chutihrualin Etihad Stadium-ah kan theihna zawng zawng chhuah a, City tana harsatna siam kan tum," tiin awlsam taka point thum pek an tum loh thu a sawi.

Clarets hian City legend Kyle Walker an lalut a, James Trafford chu Eithad Stadium lamah a phei thung. Paker chuan, "Trafford-a'n first keeper a chang lo hi pawi ka ti a, chutihrualin hei hi club ṭha bik kalphung chu a ni. Season liam ta khan Burnley tan a khel ṭha em em a, ka enkawl thei kha ka lawm. Keeper ṭha tak a ni." tiin Trafford chungchang a sawi.

City hian goalkeeper ṭha bik Gianluigi Donnarumma lakluh theiha a awm avangin an hun ṭha an bawhpelh lo a, Italian keeper hi lalutin first keeper-ah an dah nghal. Kar laihawlah City-in League Cup-ah Huddersfield 2-0 in an hneh a, Trafford hian bul ṭan mah se Burnley lakah erawh Donnarumma a rawn inlan leh tawh ang.

Pep-a tana chanchin lawmawm chu Erling Haaland-a'n goal a khung leh ṭan tawh a, Premier League an chawi ṭuma player pawimawh Phil Foden a che ṭha leh tawh bawk. Walker-a telna Burnley tan Eithad Stadium aṭanga point hlawh chhuak turin tlarhnung an hnawh a ṭul ang.