Mizoram football sang ber MPL hlutna belhchhahtute

Mizoram chhunga football inelna sang ber Mizoram Premier League chu season 12-na khelh mek a ni a, tunkar hian Lawngtlaiah GIG Motors MPL12 round 10-na khelh a ni dawn. MPL hi Mizo club-in I League an khelh theihna kawngah a pawimawh a, player ṭhahnem takin I League leh Indian Super League an khelh theih phah bawk.

MPL hi kum 2012 aṭanga ṭan kha niin inelna ṭantirha inlan, tun season-ah pawh inlan hi an awm nual. Heng player daih rei tak takte hi MPL hlutna belhchhahtute an ni. Mizoram Police hian Mizo player ṭha an kawl nasa MPL10 champion team-ah hian player tawnhriat nei ṭha pawh an tam hle.

Tun season-a Mizoram Police tana la khel F. Lalrinpuia, Lalfakzuala leh Lalbiakhlua (Biaktea) te hi MPL hmasa berah pawh Police tana khel tawh an ni a, player pathum hian top scorer chawimawina an dawng vek tawh. Police defender Ronald Zothanzama leh R. Lalthantluanga te hi MPL1-a Dinthar FC champion-na tura player pawimawh an ni a, R. Malsawmtluanga pawhin Chanmari FC leh Chhinga Veng FC te champion pui tawhin best player chawimawina ṭum hnih dawng tawh a ni.

Chanmari goalkeeper Zothanmawia hian MPL hmasa berah Dinthar a champion pui a, Aizawl FC leh Chhinga Veng champion pui tawh bawkin best goalkeeper chawimawina thlengin a dawng tawh. Dinthar hian best player hmasa ber R. Laldanmawia an kawl a, Chanmari FC tana nomawi hrang hrang chawipui tawhtu MS Dawngliana an nei bawk.

Police striker Malsawmfela hian phaia a khelh avangin MPL hmasa ber khel lo mah se Chanmari leh Chhinga Veng tan sulhnu ṭha tak a hnutchhiah a, best player leh best forward chawimawina dawng tawhtu a ni. Chutihrualin MPL hi Covid-19 vangin season khat khelh a ni lo a, season 12-na khelh mek a nih avangin MPL hmasa bera inlan player-te hi chuan hun rei an nei dawn tawh lo. Hei vang hian Lawngtlaia MPL khelh a nih hunah pawh mipuiten player tawnhriat nei ṭhate hi an hlut thiam a pawimawh hle.