Manchester City an tho leh ta

Manchester City-in Inrinni zan khan Burnley 5-1 in an sawp. Pep Guardiola hoten season bul an ṭan ṭha lo a, Clarets lakah pawh game ṭha ber an khel lo. Mahse, City hian goal nga an khung bakah point thum an hlawhchhuah avangin champion rinkai zinga mi an ni leh tawh.

Pep-a hote hian bul an ṭan ṭha a, tun hnaia khel ṭha Jeremy Doku chu an goal nawrna ber niin Belgian winger ball pet chu keeper Martin Dúbravka-a'n dang thei mah se a per chu Clarets defender Maxime Estève-a'n an lamah a tilut.

Man City goalkeeper Gianluigi Donnarumma rinlak viau mah se Italian goalkeeper pawhin tih theih loh chin a nei. Minute 38-naah Jaidon Antony pet chu Rúben Dias-a'n dang perin mikhual team-in siphurh an sut.

Pep-a hoten second half-ah team ṭha zawk an nihzia an pholang a; Doku, Phil Foden, Joško Gvardiol leh Erling Haaland te thawhrah chu Matheus Nunes-a'n minute 61-naah a volley lut. Estève vanduai zan a ni a, Clarets defender hian minute 65-naah an lamah a tilut.

Hun tawp lamah Erling Haaland a rawn inlar a, Norwegian striker hian hun tawp hmain goal hnih khungin tun season-ah goal riat a khung leh der tawh. City hi season ṭantirh lamah 10-na hnuaiah te awm mah se tunah chuan paruknaah awmin Liverpool an phak lohna chu point nga chauh a ni.