Kawng dik zawhtu Inter Milan

Serie A season bul ṭan fuh tawk lo mah se Inter Milan an insiamṭha zel. Inrinni zan inkhelah Inter hian Cagliari chu 2-0 in an hneh a, khualmualah point thum hlu tak an hlawh chhuak.

Inter Milan tan hian a tir lamah striker ṭha Lautaro Martinez chuan a khung a, hun tawp dawnah Francesco Pio Esposito chuan an chak a nemnghet bawk a, table-ah pangana dinhmun an luah.

Inter coach Cristian Chivu chuan, "A zawnin match thum kan chak ve ta, tunah chuan inrintawkna kan nei leh tawh. Season tirah kha chuan a harsa kan ti tlang a ni," tiin a sawi. Champions League-ah Ajax an hneh a, chumi hnuah Sassuolo leh Cagliari te an hneh leh ta a ni.