NSA hnuaiah Sonam Wangchuk man a ni

Environmentalist, educationist leh innovator, Sonam Wangchu chu kar liam ta Zirtawpni khan National Security Act (NSA) hnuaiah man a ni a, Rajasthan-a Jodhpur jail-ah dah a ni.

Sonam Wangchuk leh a thawhpui mi 15-te chuan Ladakh Union Territory chu state-a hlankai leh Sixth Schedule status an nihna tura Ministry of Home Affairs (MHA) leh Ladakh aiawhte inbiakna neih phutin chaw ngheia nawrh an huaihawt a, an nawrh huaihawt ni 15-naah Ladakh khawpui, Leh-ah buaina a chhuak zui a ni. Institution, building leh motor-te hal a ni a, police-te silai hmehpuahah mi pali an thi bawk. Wangchuk thusawi leh video tihchhuahte chu buaina chhuah chhanah hian puh niin, man a ni a,NSA hnuaiah man a ni zui ta a ni. Thuneitute chuan sorkar lamin meeting an neihpui tur thu an sawi hnuah pawh Wangchuk hian nawrh hi a huaihawt lui zel niin an tarlang.

Wangchuk man a ni hi Ladakh-a sakhaw pawl, civil organisation leh political party hrang hrangten an sawisel a, buaina a chhuah venthawn thilah thuneitute chuan Leh khawpuiah curfew an puan chhunzawm a, intervnet service tihtawp a ni bawk. Kargil-ah punkhawm khap a ni. Jammu and Kashmir deputy chief minister Surinder Choudhary chuan Wangchuk man a ni leh, Rajasthan jail-a dah a ni chu a chunga dik lo taka rorelna leh, democracy palzutna a ni, a ti.

Hetih lai hian Ladakh-a director general of police (DGP), SD Singh Jamwal chuan Wangchuk hi August thla a man, a nawrh huaihawtna video tichhuaktu, Pakistan Intelligence Operative nen inzawmna an nei em tih chhui mek a nih thu a sawi. Wangchuk hi Pakistan-a Dawn event-ah a tel a, hei bakah Bangladesh pawh a tlawh bawk a ni tiin, chhui chian a ngaih thu a tarlang.

Uttarkhand-ah nimin khan activist leh civil society group hrang hrangte chuan Wangchuk chhuah phutin nawrh an huaihawt. Jail aṭanga chhuah tir nghal tur leh, a laka thubuai siamte pawh sut leh vek turin an phut a ni. NSA hnuaia thubuai siamsak, Wangchuk hi thiam loh chantir a nih chuan kum rei tak jail-a tan tir theih a nih dawn bakah, bail-a chhuah pawh phalsak a ni dawn lo a ni.