IPL Governing Council-ah Mamon

India rama cricket thuneitu sang ber BCCI chuan Inrinni khan Mumbai-ah 94th Annual General Meeting an nei a, hruaitu thlanna an nei nghal. Cricket Association of Mizoram (CAM) hruaitu pawimawh Mamon Majumdar chu IPL Governing Council Member-ah thlan a ni.

Mamon hian kum 2019-22 khan IPL Governing Council member hi a chelh tawh a, 2022-25 thleng han Apex Council member a ni leh tawh bawk. Tun ṭum hi IPL Governing Council Member term hnih a chelhna tur a ni.

IPL Governing Council member Mamon chuan, "Sihhmui ground hi Ranji Trophy khelhna tlakin kan zo ṭep a, season tharah chuan kan home-ah ngei Ranji Trophy kan khel thei tawh ang.

"Indoor Cricket Facility peih fel a ni tawh a, Mizoram hmasawnna turin hmachhawp a la tam. Ground siam belh kan duh a, indoor facility tih changtlung kan duh. Heng tih puitlin hi tun term chhunga ka hmachhawp tur a ni," tiin Vanglaini a hrilh.