Stamford Bridge-ah Mourinho a kir dawn

Chelsea chuan zanin dar 12:30 hian Champions League match khel turin Benfica an mikhual dawn a, Portuguese club enkawltu hi an coach ropui leh club dinthartu Jose Mourinho a ni.

Kum 66 mi Mourinho hian Chelsea hi ṭum hnih a enkawl a, hetih chhung hian Premier League nomawi pathum bakah FA Cup, League Cup (3) leh FA Community Shield-ah te champion nomawi a chawi.

Mahse, Mourinho hi a vanglai ang a ni tawh bik lo a, tuna Benfica a enkawl chhan pawh a club enkawl Fenerbahce-in an ban vang a ni! Zaninah coach ṭha a la nihzia pholang a, Chelsea hneh hi a châk dawn - Benfica a pan hnuah hian match thum enkawl leh tawhin, vawi hnih an chak a, vawi khat draw an nei.

Mourinho ṭhian hnai tak, Portuguese manager ve tho Jose Peseiro chuan, "Hmana mi ang kha ka la ni reng e, tih pholan a, Chelsea hneh hi a châk dawn a ni," a ti a, hei hi inkhel en tichâkawmtu a tling.

Chelsea hian tun season-ah beisei angin result an nei thei lo a, league match vawi ruk khelh tawhah vawi hnih chiah an la chak - vawi hnih draw an nei a, an match hnuhnung pahnihah vawi hnih an tlawm.

Blues hian Manchester United (2-1) leh Brighton & Hove Albion (3-1) an ngam lo a, Champions League-ah Bayern Munich (3-1) an lo hneh lo tawh bawk.

London club hian Barcelona leh Napoli an la hmachhawn tel dawn bawk a, mahni muala Benfica hneh hi kal zelna tur atan a pawimawh - Blues hi inelna hrang hranga an match hnuhnung pangaah vawi khat chiah an chak a, an hneh awmchhun hi League One club Lincoln City a ni!

Lincoln hian zanin dar 11:30-ah Football League Trophy khelin Manchester United Under-21 an tum dawn a, Chelsea erawh UCL-ah an inlan dawn thung - Blues hi harsa taka an hneh club nen hian an inkar a zau takzet a, insawitheihna tur a awm lo.

Heti chung hian Chelsea neitute chuan coach Enzo Maresca chungah rinna an la nghat chhunzawm nia sawi a ni a, zaninah rin chhunzawm zel chi a nih leh nih loh a chiang ang.