Saidan aṭangin tawrhchhelna leh tumruhna ka zir - Mapuia

India-in final-ah Bangladesh hnehin 2025 SAFF U17 Championship-ah an champion a, Khawzawl naupang Lawmsangzuala chu Mizo awmchhun niin player pawimawh a ni pha. Inelna hi September 15-27, 2025 chhung khan Sri Lanka khawpui Colombo-ah khelh a ni.

Colombo Racecourse Stadium-a inelna neihah SAFF hnuaia ram pasarih te an tel a, India hi group B-ah Pakistan, Bhutan leh Maldives nen an awm. Left back Mapuia hi match hmasa pahnihah khel lo mah se an group-a anmahni el pha ber Pakistan nen an khelh ṭumin luhtir a ni a, 3-2 in hnehna an chang.

India hian semifinal-ah Nepal 3-0 in an sawp a, final-ah Bangladesh nen 2-2 a inhnehtawkin penalty shootout-ah 4-1 in an vannei a zawk. Knockout chinah Mapuia hi rinrawl a ni tawh.

Khawzawl naupang Mapuia hi SYS enkawl Regional Sports Training Centre, Saidan-ah coach Lalthawmmawia (Mamawia) enkawlna hnuaiah a awm. Mapuia chuan, "Saidan aṭang hian tawrhchhelhna leh tumruhna ka zir chhuak," tiin Kolasib-a a inkhelh hun lai chanchin Vanglaini a hrilh.

Saidan aṭang hian AIFF Talent Academy, Odisha-a awm turin thlan a ni a, hetah hian inzir chhunzawmin kumin July thla khan Goa-ah India team tur hian trial a ni a, thlan zingah amah chiah Mizo a awm.

Sangnuntluanga leh F. Malsawmkimi te fapa Mapuia chuan, "Mahni chauha Mizo awm chu hrehawm chang hi chu awm lo thei lo. Mahse, kei chuan infuih nan ka hmang a, ṭan lak nan ka hmang zawk. Chutihrualin tun dinhmun hi Pathian leh ka nu leh pa te vang chauha thleng ka ni," tiin Vanglaini a hrilh.