MPL atan Lawngtlai an inbuatsaih ṭha

GIG Motors MPL12 chu Lawngtlaiah October 2-3, 2025 hian khelh a ni dawn a, inelna thlengtu Lawngtlai DFA te inbuatsaihna a ṭha. MPL Board pawhin Lawngtlai an duhsak a, fixture ṭha an dahsak. CYLA Ground-ah hian I League club pahnih Aizawl FC leh Chanmari FC te an inkhel dawn a, en châkawm bik a ni. Chutihrualin Lawngtlai mipui tan chuan an khaw club MLS FC leh Kanan FC inkhel en a châkawm viau thung ang.

Lawngtlai DFA honorary secretary Joseph Lalhmingthanga Chinzah chuan, "MPL thleng tur hian Lawngtlai kan ṭangrual a, hlawhtling taka kan thlen theih kan beisei," tiin Vanglaini a hrilh. MPL Board chuan August thla khan Lawngtlai DFA dilna pawmin MPL12 round khat thlen dilna an pawmsak a, heta ṭang hian hmalakna hi an ṭan nghal.

August thla khan Organising Committee din nghalin chairman atan Lawngtlai bawrhsap Donny Lalruatsanga chu ruat nghal a ni a, Lawngtlai DFA honorary secretary Joseph hian ziaktu lian hna a chelh zui bawk. Organising Committee-ah hian department hrang hrang Police, PWD, PHE, P&E leh Medical lam aiawh an awm vek a, budget atan cheng nuai li an dah.

AIFF kaltlangin Lawngtlaiah kumin hian Asmita League a buatsaih a, heta player-te hian MPL match tinah player-te an zui lut dawn. MPL club pariatte hi Lawngtlai DFA chuan Liason Officer a pe vek dawn a, an cham chhung zawnginan buaipui ang. Ticket hi general leh VIP ticket siam a ni a, tun thla tir lam aṭangin zawrh ṭan a ni tawh bawk.