Real tawlhthluk laia chak Barcelona

Inrinni zan khan Madrid derby-ah Real Madrid an mualpho a, Xabi Alonso hoa Real mualphona hi Barcelona chuan remchanga lak loh an duh lo - Pathianni zan khan an mikhual Real Sociedad chu 2-1 a hnehin, Real tlanpelin, table chung ber an luah.

Barcelona hi league match sarih an khelh tawhah an la tlawm miah lo a, vawi ruk chak tawhin, vawi khat draw an nei - Real an tlanpel a, Jules Kounde leh Robert Lewandowski ten goal khat ve ve an khung.

Sociedad tan Álvaro Odriozola chuan goal khat khung ve mah se, scoreline cheimawina bak a tling zo ta lo a, Barca an chak - Catalan club hian October 1, Nilaini zanah Paris St Germain mikhualin, Champions League match an khel zui ang.

Barakhaih

Barcelona-in an Nou Camp la peih fel loh avangin an home match hmasa ber chu reserve team khelmualah an lo khel tawh a, Pathianni zanah erawh season hmasa lama an khelmual atana an hman Estadi Olímpic Lluís Companys-ah an inlan thei ta thung.

Catalan club hian inkhel ṭantir aṭangin Sociedad an nawr a, mahse, a pawimawh ber goal an khung thei lo - minute 31-naah Sociedad-in an nawr let thut a, Ander Barrenetxea siamsak chu Odriozola chuan goal-ah a chantir.

Real chak loh thu hre saa inlan Barca tan Real tlanpelhna remchang inkhel a ni a, mahse, a si phurtu zawkah an ṭang lawi si - fans an hlauthawng.

A tawpah Barca

Barca-in rei tak si phurh erawh an tum lo. Chawlhlawk hman nan minute hnih chiah a awm tawh tihah Jules Kounde chuan si phurh sutna goal a khung a, Barcelona-a harhtharna chang Marcus Rashford-a siamsak a ni.

Manchester United duh loh Rashford a hmuhnawm a, a vanneih zan ni se, goal khung thei a ni - Sociedad keeper Alex Remiro-a'n a chance neih a dansak chu uiawm a tling.

Minute 59-naah Barca vanneihna a her chhuak a, bench aṭanga luhtir Lamine Yamal chuan Lewy khung tur a siamsak. Polish striker Lewy hian kum 37 ni tawh mah se, a la tar lo tih a pholan chhunzawm zel - tun season-ah goal li a khung leh tawh.