Real captain Carvajal chawl rei dawn

Atletico Madrid laka tlawm hlim Real Madrid chuan thuchhuah siamin, an captain Dani Carvajal chuan a chawnah hliam a neih thu an sawi - a chawlh chen tur erawh an tarlang lo.

Spanish fullback hi Atletico lakah khan hliam vangin lakchhuah a ni a, right back dang Trent Alexander-Arnold chu hliam vanga a chawlh mek bawk avangin Real an buai ru hle ang tih a chiang.

Carvajal hian tun season-ah Real tan inelna hrang hranga match riat an khelh tawh aṭangin match sarih a khel a, a chawlh chen tur hi puang lo mah se, Spanish media-te chuan kar li vel tal a nih a rinawm thu an sawi.

Kum 33 mi defender hi khup hliam vangin thla kua zet a lo chawl tawh a, July khan a dam ṭan ve chauh - tunah hliam a nei leh ta. Carvajal bakah hian Éder Militão chu a kerek hliam vangin a chawl dawn bawk niin khawthlang media-te chuan an tarlang.

Real hian anni pahnih bakah centre back Antonio Rudiger leh Arnold te hliam vangin an chhawr thei lo a, zanin dar 10:15 hian Kairat Almaty chu khualmualah Champions League khel turin an lenchilh dawn.

Hetihrual hian Real tan lungngaih lutukna tur a awm lo niin a lang a, zanina an hmachhawn tur club hi Kazakhstan Premier League club niin, Xabi Alonso-a'n player ṭhenkhat a chawlh hahdamtir a nih pawhin a mak lo ang.