Champion lai Napoli hnehtu AC Milan

Italian team ṭha pahnih inkhelah AC Milan chuan an mikhual Napoli chu 2-1 in an hneh - Massimiliano Allegri naute hian Serie A hmahruaitu nihna chu Naples club lak aṭangin an chhuhsak nghal bawk.

Pathianni zan San Siro-a inkhelah, mualneitu Milan tan Alexis Saelemaekers chuan minute thumna lekah goal a khung nghal, forward Christian Pulisic-a siamsak chu lo chang fuhin hnai tak aṭangin a pet lut.

Chawlhlawk hmain Milan bawk an che fuh - American forward Pulisic chuan chiang zetin a khung, goal an khung dawna Milan player-te ball inpe kual a hmuhnawm a, box chhungah Youssouf Fofana chuan pet nuam tawk chiahin a lo dan persak a ni.

Napoli an chuai a, mahse second half-ah beiseina thar an nei. Defender Pervis Estupinan chuan Giovanni di Lorenzo-a goal khung mai tur a titlu, hnawhchhuah a nih bakah penalty a chawi tel nghal bawk.

Kevin de Bruyne rawn ding chhuakin chiang takin a khung a, ball la let nghalin, mual laiah a tlan pui. Napoli lamin si phurh sut zawh an tum tih a chiang, mahse a tawp thlengin an thei ta lo - Belgian midfielder De Bryune hi lak chhuah a ni a, inkhelh a la duh avangin a lawm lo tih a hmelah a lang.

AC Milan manager Max Allegri chuan, "Team ṭha tak mai Napoli lakah hnehna kan chang a, a tawp lamah phei chuan kim lo chungin kan khel. Darkar chanve chuang a tlem zawk ni chungin kan khel a, khatiang chunga point thum hmuh theih chu a hlu," tiin a sawi.

Milan hian Serie A match vawi nga an khelh aṭangin point 12 an hmu a, table chung berah an awm - point hmuh tam lamah Napoli leh AS Roma te nen an inzat a, goal difference neih ṭhat vanga sang an nih avangin an hmahruaina a nghet rih lo thung.

Napoli manager Antonio Conte chuan, "Kan inkhelhna hmun kha San Siro a ni a, minute lina lekah si kan phur hman der tawh, khatiang dinhmun aṭanga thawhchhuah kha chu a harsa tawh ṭhin a ni, chutihrualin kan goal chhuah dan erawh ven theih tur a ni.

"Tlarhnung phui hi kan chakna ṭhin a ni a, tun ṭumah kha chuan a tir aṭangin a pawp tlat. Kan chak lohna lai hi a rang thei ang bera siamṭhat kan tum ang," tiin a sawi.