Diego Simeone a ṭap!

Inrinni zan khan rin hlawh lo zawk Atletico Madrid-in Real Madrid chu 5-2 in an sawp a, November 1950 hnua Atletico-in an ṭhenawm club laka goal nga an khung hmasak ber a ni.

Atletico chak hnuah coach rorum Diego Simeone a ṭap a, beisei anga season ṭan lo coach hi tuman an dem lo ang - Argentine coach hian a ṭah chhan a sawi chhuak zui.

Simeone chuan, "Ka taksaah khan thil inhnawh tawt vek ang mai hian ka awm a, ṭap lo thei ka ni lo a ni. Beisei angin season bul kan ṭan lo a, lang lo lama nasa taka hnathawkten hriat an hlawh tawk lo.

"Chutiang kara khatianga hnehna chan theih kha chu a lawmawm em a ni," tiin a sawi a, Real Madrid laka goal nga ngawt an khung kha a beisei aia a ropui thu a sawi.

Atletico Madrid tana chanchin lawmawm chu striker Julian Alvarez a 'form' leh ta hi a ni a, Real lakah pawh khan goal hnih a khung - Real an hmachhawn hma hian Rayo Vallecano lakah hattrick a siam bawk.

Madrid khaw club hi an league match hmasa pangaah vawi khat chiah an chak a, vawi thum draw neiin, vawi khat an tlawm - tunah erawh match hnih a zawnin an chak ta a, an inringtawk sawt ang.

Atletico Madrid hian zanin dar 12:30-ah Champions League match khel turin Eintracht Frankfurt an mikhual dawn a, an match hmasa zawkah Liverpool chu 3-2 in an ngam lo tawh.

Spanish club hian UCL-a an tum tur zingah Arsenal, Inter Milan leh Galatasaray te an la nei a, Reds laka an tlawm tawh bawk avangin, last 16 lut tlang nghal turin zanina chak hi an tan a pawimawh ang.