Solanke dam chiang thei lo

Tottenham Hotspur striker Dominic Solanke chuan kar hmasa khan club training zawm leh zuai tawh mah se la, training a la neih chhunzawm leh rih lo a, English striker hi eng tikah nge a dam chian ang, sawi theih a la ni lo.

Solanke hi season ṭantira Manchester City nen an intawn ṭumin a inhliam a, thla khat aia tam a chawl tawh. Kar hmasa khan club training a zawm zuai avangin Spurs fan-te an phur hman a, mahse, a la inlan thei lo cheu.

Hetihlai hian Paris St-Germain aṭanga loan-a an hawh Randal Kolo Muani pawh match khat chiah la inlanin, training-naah Pape Matar Sarr nen intipalhin, tun thlengin a la dam chiang lo.

Spurs boss Thomas Frank chuan, "Kar khat vela dam mai thei dinhmunah a ding hman a, mahse, vanduai chang chuan beisei aiin a rei ve ṭhin bawk," tiin Kolo Muani chungchang a sawi.

Tottenham hian zanin dar 12:30-ah Champions League match khel turin Bodo/Glimt an lenchilh dawn a, an match hmasa zawkah Villarreal chu 1-0 in an lo hneh tawh.