Haaland-a'n goal a khung leh dawn?

Erling Haaland tan goal khung harsatna hmun a awm lo - Bundesliga lamah a theihna a pholan hnuin Premier League pawh a tan chua a nem mah mah emawni tih mai tur a ni, chutiang bawkin Champions League pawh a ngam hle.

Manchester City chuan zanin dar 12:30 hian UCL khel turin AS Monaco an tlawh dawn, an striker ṭha Haaland-a'n Ligue 1 club lakah hian tunlaia a goal khung kaltluang pawh a chhunzawm ngei a rinawm.

An match hmasa zawka Napoli an hneh ṭum pawh khan Haaland hian goal a khung a, European football inelna sang berah hian match 49 lekah mellung pawimawh a phun - goal 50 khung tura hun mamawh tlem Ruud van Nistelrooy (62 games) a khum chiang hle.

Naples club an hneh hnu lawkah Pep Guardiola chuan, "Tun anga hma a sawn zel chuan Erling hian Cristiano Ronaldo pawh a khum thei ang," a ti hial a, UCL goal 141 khungtu meuh pawh a khum theih a ring a, hun a pek tam a rinawm bawk.

Kum 25 mi Haaland hian season kal laia inelna hrang hrangah match sarih a khelh aṭangin goal kua a khung leh der tawh a, dan theih loh ang maiin a kaltluang leh tawh - Phil Foden a dam leh tak avangin Haaland hlauhawmna chu belhchhah a ni.