Volleyball inelna lian an ṭan dawn ta

Mizoram Volleyball Association (MVA) buatsaihin - GIG Motors Inter VC/LC Volleyball Tournament 2025 chu vawiin chawhma dar 10:00 aṭang hian R. Dengṭhuama Indoor Stadium, Mualpuiah khelh a ni dawn a, match 12 khelh nghal tura ruahman a ni.

Inelnaah hian mipa team 64 leh hmeichhe team 14 te an inlan dawn, team tel zawng zawng hi 78 an ni.

Ruahman dan chuan, inelna hi Ocotober 1-10 chhungin chhunah an inkhel ṭhin ang. Inkhel zawng zawng chu MVA YouTube leh LPS-ah live a tihchhuah tur a ni.

Player-ten an vote neihna hmunah an khel dawn a, vote la nei lo te chu aadhar hmanga endik tur an ni ang. Inkhelh hun apiangin ID/aadhar card ken zel tur a ni a, keng lo tan khelh theih a ni dawn lo - vote neihna hi January 1, 2025 hnu lama sawnte pawm a ni dawn lo bawk.

Squad-ah player 20 ziah luh theih a ni a, inkhelh dawnah mi 12 zel ziah luh theih a ni thung ang a, tournament hi best of 5 hmanga khelh tur niin knockout hmanga inel tur a ni ang.

MVA bakah a hnuaia district leh zone ten an hrem lai player an inlan thei dawn lo a, khingpui tur team lamah player sawisel (complain) duh nei tan inkhelh hmain sawisel theih a ni dawn, inkhelh hnuah erawh sawisel a rem dawn lo.