Imphalah Aizawl FC an chak lo nawn

Aizawl FC chuan Neroca an hneh lohna hmun Khuman Lampak Main Stadium-ah Inrinni khan I League kai thar Trau 2-1 in an hneh lo a, Mizo club hian Imphal-a match hnih an khelhah an chak lo ve ve. Standly Rosario hote hian match riat an khelh aṭangin point riat chauh an hmu a, an  hnuaiah Indian Arrows chauh an awm.

Coach Standly Rosario-a'n Argentine midfielder Matias Veron bul a ṭantir a, Justice Morgan leh MC Malsawmzuala te aiah bul ṭan turin Jonathan Lalrawngbawla a thlang. AFC-in bul an ṭan ṭha a, Electric Veng FC aṭanga an lakluh Ramhlunchhunga thawhrah sengin Rochharzela'n minute 22-naah goal hmahruai a khung. 

Goal chhuah vangin tun hnaia che ṭha tluang Trau an talbuai lo a, mual ding lamah Krishananda Singh chu an nawrna ber tihin a sawi theih. Minute 27-naah Laishram Premjit Singh-a'n Trau siphurh a sut a, minute 66-naah Krishananda Singh-a'n chakna goal a khung. Goal hnihna luhnaah AFC-in Chanmari FC aṭanga an lakluh Zothanmawia'n a tihtur a ti tawk lo a, Aizawl FC tlarhnung buaina chinfel a la ni lo. Aizawl FC hian February 1-ah Real Kashmir an mikhual dawn a, Mizo club-in hrem vanga match hnih khel thei lo Ghanaian defender Joseph Adjei an chhawr theih dawn chiah avangin chak tura rinkai zawk an ni ang.