Barcelona khelmualah champion team PSG

Champions League inkhel hmuhnawm bik chu zanin dar 12:30 hian chhawpsakin kan awm dawn a, champion lai Paris St-Germain chuan khualmualah team ropui Barcelona an lenchilh dawn.

PSG hi treble champion an ni a, an coach chu Barcelona tana treble nomawi lo chawi tawhtu Luis Enrique a ni. Spanish coach hian a hming chherna club lakah a team thar chakpui a tum dawn.

Chutihrual chuan Barcelona hi tun season-a tlawm la nei miah lo team an ni a, La Liga champion lai hian league lamah pawh table chung ber an luah mek - PSG hneh an châk ang tih a chiang a, hneh turin squad an nei ṭha tawk bawk.

Mahse, PSG hneh mai hi thil awlsam a ni dawn lo tih chu chhiarkawp thiam kher lo tan pawha chhut harsa lo tak a ni a, hei tak hi zanin inkhel tihmuhnawmtu tur chu a ni - meng rei leh phawt mai ang!

Barca an hmuhnawm

Flick-a enkawl Barca-in tun season-a league match sarih an khelh tawhah tlawm an la nei lo a, match rukah hnehna changin, vawi khat draw an nei - table chung ber an luah mek a, champion nawn an tum.

Barca hian league-ah ringawt goal 21 tehmeuh an khung tawh a, hei vang hian goal khung thiam an ngah tih a chiang - hei tak hi inkhel hmuhnawmna belhchhahtu tur a ni ang.

Tlarhmaah Robert Lewandowski hoin Lamine Yamal leh Marcus Rashford te ho rawn inkawp thei tura ngaih an ni a, Raphinha inhliam mah se, Ferran Torres a la awm cheu bawk avangin PSG tlarhnung tan thlamuanga awm mai chi a ni lo.

Catalan club hian Champions League-ah match khat khel tawhin, Newcastle United chu 2-1 in an hneh tawh bawk a, PSG an paltlang leh a nih chuan an tan league stage-ah fixture hautak lutuk a awm tawh rih lo ang.

Barca an ṭha?

Flick-a'n PSG an mikhual hmain an team ṭhatzia a sawi a, 'rilru game' khelin, French club player-te vau zam a tum. Flick chuan, "Kan midfield en ila, Pedri leh Frenkie de Jong kan nei a, an inman em em bawk.

"An khelh duh dan an hria a, an inhrechiang. Anni pahnih inkawp fuh lutuk hmuh hi nuam tak a ni - an inkawp tawh chuan kan khingpui tan nawr kan harsa a, ball kan chan tam phah a, hmun awl kan insiam bawk. He team hi ka chhuang takzet a ni," a ti.

Chutihruala hriat tel tur chu PSG hi European club zinga midfield nei ṭha ber pawl an ni ve tho a, Barca lakah duai an tum dawn lo. Mahse, PSG hi an dam kim lo a, he thu buatsaih a nih lai hian an dinhmun a la chiang lo hlawm!

Fabian Ruiz hi hliam tenau nei a ni a, Vitinha pawh an league match hnuhnung berah lakchhuah a ngai. Mahse, khawthlang media ṭhenkhat chuan player pahnih inlan theih tur thu an sawi a, an inlan a nih chuan Barca midfield aia an ropuina pholan an tum ang.

Dembele tel loin...

Barcelona fans tam takin Lamine Yamal-a'n Ballon d'Or dawn a phuah an ngai a, mahse, an player hlui, hliam vanga Barca-a beisei phak lo, PSG lama beisei phak baka vul ta Ousmane Dembele-a'n a dawng daih!

Dembele-a'n a dawng hi football fans tam zawkin awm an ti a, a club hlui Barca chungah lawmthu a sawi thlap bawk. Heti chung hian French forward hi Barca khelmuala a kir lai fans tam takin an hmu châk a, Yamal nen intawng se, an ti.

Mahse, Dembele hi hliam vangin a inlan thei dawn lo a, Luis Enrique luhai tizual turin Desire Doue pawh a inlan thei dawn lo. Captain Marquinhos leh Joao Neves te pawh hliam vangin an inlan thei dawn lo.

Khvicha Kvaratskhelia pawh league-a Auxerre nen an inkhelh ṭumin hliam vanga lakchhuah a ngai a, he thu buatsaih a nih lai hian a dinhmun a la chiang lo. Thil chiang tak erawh PSG-in an ṭhat dan berin Catalan club an hmachhawn dawn lo - heti chunga an chak zawh loh chuan Barca tan mualphona a tling ang.

A hming Enrique

Luis Enrique hi Spain coach a nih laia Real Madrid player tel miah loa squad rem ngam ngat kha a ni a, a rilru hi a 'Barcelona' rem rem hle. Mahse, zaninah chuan a club hlui hi hneh a tum dawn.

PSG-in an ṭhat dan berin Spain pan thei dawn lo mah se, coach Enrique a mangang duh lo. Spanish coach ropui chuan, "PSG chauh hi hliam vanga talbuai club kan ni lo. Fixture hautak em em avangin club dang pawhin hliam an nei ve tho a ni.

"Kan hmaa harsatna paltlang tur chuan a êng zawnga thil kan thlir tlat a ṭul a ni," tiin rilru hahna chuan a team a chhawk loh tur thu a sawi a, Barca khelmualah hnehna hlado chham ngei a tum.

PSG hian league match ruk an khelh tawhah vawi nga hnehna changin, kar hmasa khan Marseille chu khualmualah rin loh takin an ngam lo. Mahse, hemi hnu hian Auxerre chu 2-0 in an hneh tawh a, UCL bikah Atalanta chu 4-0 in an sawp tawh bawk - an inringtawk khawp ang.