Magpies tan intuai tharna hun

Newcastle United chuan zanin dar 10:15 hian Champions League match khel turin Union Saint-Gilloise an lenchilh dawn a, Magpies tan intuaitharna hun ṭha a ni thei ang.

Magpies hian tun season hi transfer boruak aṭang tawhin an tifuh hleithei lo a, league lamah pawh vawi khat chiah an la chak - an vanduai ṭhin takzet.

Newcastle-in an hneh tawh awmchhun hi table mawngphah luah mektu, tun season-a la chak miah lo Wolverhampton Wanderers an ni a, vawi thum draw neiin, vawi hnih an tlawm.

Vawi hnih an tlawmna hi Liverpool (3-2) leh Arsenal (2-1) a ni a, hun pek belhah ve ve goal an chhuah! Match thum an draw-ah erawh goal an khung lo vek a, Newcastle an vanduai tih loh rual a ni lo.

Champions League-ah lah Barcelona hmachhawnin bul an ṭan a, 2-1 in an hneh lo. Zaninah team nem zawk tia sawi theih Union Saint-Gilloise an lenchilh dawn - Eddie Howe-a leh a naute tan inrintawkna nei tura result ṭha hlawhchhuah hun a ni a, an chak zo lo leh a nih ngat chuan Magpies chunga beiseina tihsan chhunzawm a harsa khawp ang.