MPL12-ah player 196 inlan tawh

GIG Motors MPL12-ah player 200 chuang an inziak lut a, player 196 khelmual chhungah an inlan tawh. Lawngtlai bikah chuan round khat chauh khelh a ni dawn a, team tinin substitution panga ṭheuh an hmang a nih pawhin player 96 hmuh an ni ang.

Round kua khelh tawha thlak miah loa la khel tluan vek player paruk an awm. Aizawl FC vice captain Rohmingthanga hi tlarhnungah a la khel tluan vek a, Mission Veng tlangval hi I League club tan innghahna pawimawh a ni. Season liam ta khan Delhi club Sudeva tan khelin Santosh Trophy-ah Delhi aiawhin a khel a, quarterfinal hial thlenpuiin amah pawhin nasa takin hma a sawn. Rohminga hi Aizawl FC-in pakhatna dinhmun an luah theihna chhan pawimawh zinga mi a ni.

Chanmari goalkeeper Zothanmawia hian a la khel tluan vek bawk a, T. Mawia hi ball pet a thiam vangin Chanmarians-in tlarhnung aṭanga an nawrna kawngah pawh a pawimawh hle. MPL hmasa berah Dinthar FC a champion pui hnuah Aizawl FC leh Chhinga Veng te a champion pui leh tawh a, MPL12-ah vawi li clean sheet nei tawh mah se mamawh hun takah a theihna lantir loh ṭum a nei. College Veng goalkeeper hian a club hlui Aizawl FC a hmachhawn hunah a theihna tak pholan a tum ang.

Player la khel kim vekte hi tlarhnung lam vek an ni a, T. Mawia bakah hian best goalkeeper chawimawina dawng tawhtu F. Lalmuanawma pawh a tel. Police keeper Muanawma'n khelh ṭhat ṭum a nei a, khelh chhiat ṭum pawh a nei a, goal chhuah tam ber team-a a khel tluan vek avangin tun season bikah erawh fak a harsa. Police defender Lalhmunmawia (Ahmuntea) pawh a la khel tluan vek a, ani pawh hian theihna nei sang mah se team khelh dan thlirin fakna tur aiin sawiselna tur a tam zawk.

Saikhamakawn left back C. Lalhunruata leh SYS FC left back Abraham Lalngaihsaka te an la khel tluan vek. Khawlailung tlangval Hunruata hian tawnhriat a ngah tawh a, ke vei lama pet a nih bawk avangin team tan a ṭangkai.

Chutihrualin a tawnhriat ngaihtuahin position dik loa awm a nei leh ṭhin a, Mizoram team-a tel pha turin tun aia a khelh ṭhat a ṭul. Lunglawn tlangval AB-a hi vei lamah awm ni mah se dinglama ball pet a ni thung a, SYS team an insiksawi nasat vangin a theihna tak a la lanchhuahtir loah a ngaih theih.