Player 59-in goal an khung tawh

GIG Motors MPL12-ah goal 122 a lut tawh a, goal hnih hi own goal niin goal 120 hi player 59 khung a ni. Aizawl FC striker Zomuansanga'n goal 10 khungin a la khung tam ber a, Saikhamakawn striker Suangngaihmuana'n goal sarih khungin Khawbel tlangval Zomuana hi goal thumin a pha lo.

Own goal pahnih hi Police player pahnih Lalhmumnmawia leh Lalruatpuia te khung a ni a, tun ṭum inelnaah hian match tinah 3.39 goal lut ang a ni. Round kua khelh tawhah round tinah goal 10 a lut tling vek a, round 6-ah khan goal 18 lutin goal la luh tam ber ṭum a ni.

Aizawl FC-in kumin MPL-ah goal la khung tam berin goal 26 an khung tawh a, table mawngphaha awm SYS FC erawhin goal li chauh an la khung thung. Lunglei club chauh hi MPL12-a goal 10 la khung tling lo an ni.

SYS hian goal 21 chhuah tawh mah se goal chhuah tam ber an ni bik lo a, an chung chiaha awm Mizoram Police-in goal 24 chhuahin an la chhuah tam ber. Goal khung tam ber Aizawl FC-in goal venhim an thiam ber a, goal nga chauh an la chhuah.

Tun season MPL khelh tawh dan thlirin Lawngtlaia khelh round 10-ah hian goal 10 tal lut turah a ngaih theih a, Lawngtlai mipui mit ti tlei turin goal hmuh tur a awm ngei ang.