Everton leh West Ham inhnehtawk

Premier League season bul ṭan fuh lo West Ham United chuan Everton khelmual aṭangin point khat an hlawh chhuak - Goal an phurh hmasak hnuah Jarrod Bowen hmangin an sut a, 1-1 in an inhnehtawk a ni.

Thawhṭanni zan khan Hill Dickinson Stadium-ah West Ham hi an lenglut a, mualneitu lam tan Michael Keane chuan minute 18-naah James Garner-a siamsak chu a tauh lut a, amah vengtu ten an veng hneh lo.

Nuno Espirito Santo-a'n West Ham a enkawlna hmasa ber a ni a, tlawm mai an hlau hle. Second half-ah Bowen chuan box chhungah ball a chang a, defender Vitalii Mykolenko chuan rawn hnaihchilh mah se a buai phah lo, inringtawk takin a duhna laiah tak a pet lut.

Everton tan Jack Grealish a hmuhnawm leh hle a, a ke aṭangin ball ṭha leh hlauhawm a chhuak fo. Mahse, ni dang angin English forward hi a vannei tawk lo, goal a sual chhuah loh bakah a ṭhiante khung tur a siamsak thei lo.

Toffees coach David Moyes chuan, "Thil lawmawm leh lawmawm loh tam tak kan hmu, a lawmawm lai chu goal kan khung hmasa leh point kan hlawh chhuak kha a ni a, kan phu tawk kan hmu niin a lang.

"A lawmawm loh lai chu West Ham tana hun ṭha kan pe hnem lutuk kha a ni, keimahni khelmualah ngei mai kan khingpui khan goal khung theihna remchang an insiam tam lutuk kha a dik lo," tiin a sawi.

West Ham manager Nuno Espirito Santo chuan, "Min ṭan tute tana inkhel hmuhnawm lantir kan tum tur a ni a, chumi bakah chuan an lawmna thlen turin result ṭha neih kan tum tur a ni bawk, tun dinhmunah chuan kan inkhel en châk an tam lo.

"Result ṭha kan nei a nih phawt chuan khelmuala min thlawp turin an rawn kal khawm ṭha leh em em ang, chutiang chu thlen tir kan tum dawn a ni," a ti. Hammers hian point li chauh an la hmuh avangin an hnuaiah Wolves chauh an awm.