Isak awm hi ka ṭhatpui ang - Ekitike

Liverpool forward Hugo Ekitike chuan British record transfer fee-a Liverpool zawmtu Alexander Isak awm chu, player a nihna anga a chhawr zawk tur thu a sawi.

Kum 23 mi Ekitike hian pound maktaduai 69-in Reds hi a zawm a, match 10 a khelhah goal nga a khung der tawh. Mahse, Reds hian Ekitike duhtawk loin Isak an rim zui a, Newcastle United striker hi £125mtd-in an lei zui.

Liverpool boss Arne Slot-a'n striker pahnih hi eng tin nge a hman ang, tih chu mipui zawhna a ni a, he thu buatsaih a nih thleng hi chuan an la khel dun lo - Reds hian nizan khan Champions League-ah Galatasaray an hmachhawn a, striker pahnih inlan leh lan loh kan hre hman lo.

Ekitike chuan, "Hetiang ang club lianah chuan thil nihphung ve reng a ni a, club lian takah striker pakhat chiah an neih ka hre ngai lo - Isak kan neih belh hi team tan a ṭha a ni. Ka kum zat ngaihtuah ula, hmasawnna tur ka la ngah a, Isak a awm belh ta hi ka tan chuan a lawmawm a ni.

"Kan khelh dun leh dun loh chu coach thutlukna tur a ni a, ka lo sawi ve tur a awm lo. Striker pahnih emaw, pakhat emaw pawhin ka lo khel tawh a, ka thei ve ve," a ti.

Ekitike chuan Carabao Cup-a a goal khung lawm vanga a red card hmuh chungchang sawi zuiin, "Ka tidik lo a, mahni inhrem mai ka ni. League-ah ka ṭhiante inkhel en ka ngai zui a, mahse, instagram lama ka pholan tawh angin ngaihdam ka dil a ni.

"Khatiang thil kha chu a thleng nawn tawh lo ang. Kei chuan inkhelh zel ka duh a, football chiah ka ngaihtuah," a ti a, thil dang intihbuai tir a duh lo.