Chhetri-a'n India camp a zawm

Kum 41 ni tawh mah se, India-in a aia ṭha zawk striker chherchhuah a la neih loh miau avangin Sunil Chhetri chuan India squad a zawm ve leh ta a, a rual hian Bengaluru tana a khelhpui Rahul Bheke leh Noarem Roshan Singh ten India squad hi an zawm ve bawk.

October international break-ah India hian AFC Asian Cup 2027 qualifier an khel dawn a, October 9 hian Singapore chu khualmualah lenchilhin, October 14-ah an lo mikhual ve leh thung ang.

Blue Tigers hian match hnih khelh tawhah chak la nei loin, point khat an hmu a, group C-ah table mawngphah an luah mek. Singapore bakah hian Bangladesh chu khualmualah lenchilhin, Hong Kong an la mikhual dawn bawk a, India tan Asian Cup khel turin chetsual theih a ni tawh lo.

India coach Khalid Jamil chuan probable squad-ah player 30 koin, a tirah player 15 bak training turin an in report lo. Hei hi damlohna leh club lamin player an la chhuah loh vang a ni.

Bengaluru player-ten India squad an zawm hma hian a tira zawm lo aṭangin, East Bengal defender Anwar Ali leh forward Mahesh Singh, Punjab FC player Muhammed Uvais, Pramveer, Nikhil Prabhu leh Muhammed Suhail ten squad an zawm bawk.

Hetihlai hian AIFF chuan Asheer Akhtar, Jithin MS, Manvir Singh (jr), Mohammed Aimen leh Vibin Mohanan te chu squad aṭanga paih an nih thu an sawi a, India squad-ah hian Lallianzuala Chhangte leh Hmingthanmawia Ralte (Valpuia) te chu Mizo awm an ni.