Steven Fletcher a chawl

Scotland international hlui Steven Fletcher chuan inkhelh a chawlhsan thu a puang a, kum 38 mi hian season hmasa kha Wrexham tana khelin, a club hnuhnung ber a ni ta a ni.

Scottish club lar Hibernian aṭanga a professional zinkawng zawh ṭantu hian Premier League-ah Burnley, Wolverhampton Wanderers leh Sunderland tan a khel hman a, Ligue 1-ah Marseille tan a khel tawh bawk.

A hnu lamah Championship club Sheffield Wednesday leh Stoke City tan a khel a, Scottish Premiership club Dundee United tan season khat a khel bawk - kum 2023 khan a hun laia League Two club Wrexham a zawm a, player pawimawh niin, League One a kaipui.

League One-ah season khat khelin, Championship khel turin a kaipui a, match 40 khel tling mah se, bench aṭanga a luh a tam zawk a, Championship kaipui leh mah se, Wrexham hian an chhuah zalen.

Kum 38 mi hian club dang zawm leh ai chuan chawlh mai a thlang ta a, Scotland tan match 33 khelin goal 10 a khungsak hman.

Kum 38 mi striker chuan, "Ka naupan lai aṭangin football hi ka nunna a ni a, hetianga chawlhsan a ngai mai tur hi a harsa he. Mahse, thutlukna dik a ni tih erawh ka hrechiang," a ti - club football-ah match 749 khelin, goal 189 a khung hman.