Spurs an chak nuamsa; inkhel aia ngaihven hlawh Marine!

FA Cup third round-ah Tottenham Hotspur chuan 5-0 in non-league club Marine an hneh a, Carlos Vinicius chuan hattrick-a siam -  Lucas Moura leh  substitute Alfie Devine-ten goal khat ve ve an khung bawk. 

Liverpool academy chhuak, July 2020-a Wigan Athletic aṭanga Spurs pantu Devine-a'n London club a pan hnua a match hmasa ber a khel ve chauh a, goal a khung zui - kum 16 leh ni 163 mi niin Spurs tana goal khung thei naupang ber record a siam. 

Marine hi Northern Premier League Division One North West-a khel lai an ni a, an league inelna hi English eight division a ni - Spurs nena an inkarah hian team 160 ngawt an awm a, Jose Mourinho-a'n player ṭha tak tak khelhtir a ṭhulh phah lo. 

Hetichung hian Marine hi chance duhawm nei hmasa zawk an ni a, Neil Kengni-a shot chu keeper Joe Hart-a'n a dan theih loh hnuah bar-in a dansak - a tawpah erawh team ṭha leh hausa zawk an chak a, Marine zinkawng a tawp. 

Mi 3,185 lenna Marine khelmualah Covid-19 vangin fans an pungkhawm thei lo a, hei vang hian Marine hian £100,000 vel an sum hmuh tur chu an chanah an inngai. 

Non-league club hian Spurs ang club lian mikhual ve lema sum lama hlawkpui loh an duh lo - virtual ticket chu £10 (Rs. 990) in an zuar a, mi 30,697 zetin ticket hi an leisak. 

Spurs boss Jose Mourinho pawhin an khingpui team dinhmun a hre reng a, ticket leitu zingah hian a tel. Ticket hian vanneihna a keng tel a, a vannei fal chuan Marine club hi match khat an enkawl thei dawn - fans tam tak chuan Mourinho hi he ticket-a vanneihna chhartu ni se an ti ngawt ang!

Marine hian Spurs an hmachhawn hi ticket piahlamah an hlawkpui nasa hle. Preliminary round aṭanga FA Cup khel ṭan team hian round thumna thleng an khelh theih avangin prize money-ah £80,000 (Cheng nuai 79.26) an dawng a, BBC One-in live-a an inkhel a pekchhuah avangin £75,000 (Cheng nuai 74.28) an dawng bawk. 

English club tenau zual ten FA Cup-ah thui tak thlen a harsat avangin an thlen china club lian hmachhawn hi an chak ber a ni ṭhin - sum tam tak a ken tel vang a ni. 

Marine pawhin an beisei ang ngeiin sum ṭhahnem tak an dawng a, 5-0 ngawtin tlawm mah se an inkhelhna phena chanchin hi a ngaihnawm hle - Spurs player-ten dressing room

pangngai hman tur an nei lo!

Covid-19 vangin dressing room-ah pawh social distance dan zawm a ngai a, Spurs players leh coaching staff-te chu Marine-in dressing room an neihsaah an leng lo. 

Hei vang hian Marine chuan puipun nana hawh theiha an siam 'Arriva Suite'-ah Spurs tan dressing room an siamchawp a, ni danga inneih leh function pawimawh dang hman nana mipuiin an hawh ṭhin hi Jose-a'n a player-te fuih nan a hmang ta thung. 

Covid-19 vangin fan-ten stadium chhunga lutin inkhel an en thei lo a, mahse, tum miau chuan kawng a awm zel. Khelmual bula thingkungah fans ṭhenkhat chu an lawn a, a ṭhenin in chung leh bathlar aṭangin an en bawk - Lammual vanglai ang mai a ni!

Stadium-ah fans an lut thei lo chungin keeper Bayleigh Passant-a'n Dele Alli shot a dante chuan thawm chu ring tak a ni a, Kengni-a shot-in bar a per te khan a ring lehzual. 

Liverpool ang thoa Merseyside huam chhunga club Marine hian Reds ṭantu pawh an nei nual ang tih a chiang a, khelmual sirah fans ṭhenkhat chuan Jurgen Klopp-a lim keng chungin inkhel an en. 

Second half, minute 65-naa Gareth Bale tlanlutte chu Marine fans tan chuan lawmna tham a tling a, an muala khawvel footballer manto ber lo ni tawh hmuh chu inchhuanna tham a ni - social media lamah pawh an ziak zui nasa hle.

Spurs-in pound tluklehdingawn man hu stadium an nei a, an khingpui Marine erawh mi 3,000 chuang lenna awrh stadium-a inkhel ṭhin an ni. Team pahnih inthlauhna hi sang vet vet tak a ni. 

Mahse, football mawina a lo lang - Marine hmachhawn tur Spurs fan-ten an club khingpui tan sum an khawnsak a, US lama Spurs fan blog lar tak Cartilage Free Captain phei chuan Marine player-te hak tur kekawrbul an tum thei hial. 

Liverpool defender hlui Jamie Carragher chuan ama enkawl JC23 Foundation kaltlangin warm up laia player-te hak tur thawmhnaw a tumsak - fashion entrepreneur George Davies-a'n he inkhel hriatreng nana scarve-a siam chu online lamah za chuang zet hralh a ni bawk. 

Everton coach leh Marine innghahna Crosby-a cheng Carlo Ancelotti chuan inkhelh hma khan Marine hi duhsakna a hlan a, inkhelh zawhah Jose Mourinho titipui a duh thu a sawi lang bawk a ni. 

Marine coach Neil Young chuan FA Cup-a an thlen chin leh Spurs an hmachhawn thei chu an tan chhanhimtu a nih thu a sawi a, Young chuan, "Division thum hnuai lamah hi chuan puihna a awm tawh lo. 

"Marine-a Spurs mikhual theih hi kan beisei ngam loh thil a ni a, FA Cup-a kan thlen chin hi kan tan chuan chhanhimtu a ni," tiin a sawi a, a hlim hle. 

Young hi railway operator Merseyrail-ah facility manager ni lai a ni a, Spurs an hmachhawn dawn avang hian a hna aṭangin chawlh a lak belh a ngai hial. 

Marine player zingah khan car zawrhna hmuna hnathawk, telecom manager, bawlhhlawh paih, factory hnathawk, zirtirtu leh damdawi ina thawkte an kat nuk a, an starting XI zingah khan professional footballer chu pahnih chiah an awm!

Hei mai hi a ni lo - an player zingah kar khata £300 (Rs. 29,745) aia hlawh hnem an awm lo a, English football-a sum tamzia ngaihtuah chuan a beitham hle. Inkhelh zawhah khan Marine player-te hian Tottenham aṭangin jersey thar an dawng vek a, hei hi Covid-19 vanga kawr inthleng a rem loh vang a ni. 

Tottenham Hotspur-in Nilaini zan dar 1:45-ah league match khel turin Aston Villa an lenchilh dawn a, hetihlai hian Marine erawhin an hma hun an hre lo thung.

Marine coach Young chuan, "Tun season-a kan game tawp ber a ni hial mai thei. Kan hmaah eng nge in chhawp kan hre lo a, hei vang hian ka player-te hnenah pawh hna ṭha tak an

thawhzia sawi ka duh a ni," a ti. 

Covid-19 vangin English sixth division hnuai lamte chu chawlhtir vek an ni rih a, hei vang hian Marine tan Spurs an hmachhawn kha December 26 hnua an match hmasa ber a ni - tun season-ah league match sarih chiah an khel hman. 

Marine chief executive James Leary chuan inkhelh hma khan league tihtawp a nih rih avangin player-te chu chawlhtir an nih tur thu a lo sawi tawh.