Lianzuala 'hero' mah se Chennaiyin chak zo lo

Pathianni zan Indian Super League inkhelah team talbuai Chennaiyin leh Odisha an inhmachhawn a, 0-0 in team pahnih an ṭin - Chennaiyin forward Lallianzuala Chhangte chu hero of the match-ah thlan a ni. 

Lallianzuala hian Odisha tlarhnung vawi tam rum ṭhaih mah se goal erawh a khung thei lo a, Odisha tana khel Jerry Mawihmingthanga chu Mizo player langsar dang a ni bawk - Jerry hian Lianzuala ang thoin goal erawh a keng tel bik lo a, a hun ṭha neih chu Chennaiyin keeper Vishal Kaith chuan a dansak. 

Odisha tan Diego Maurício chuan goal hmahruai a khung niin inngai mah se linesman-in offside flag a phar a, Odisha vanneih zan a ni lo. Chennaiyin tan Jerry Lalrinzuala chuan inkhel bul a ṭan bawk a, Odisha lamah Daniel Lalhlimpuia'n bul a ṭan ve bawk - Chennaiyin hi match li chhung a zawnin an chak zo tawh lo a, playoff khel phak tur chuan insiamṭhat an mamawh hle. 

Pathianni zan inkhel dangah Kerala Blasters chuan 3-2 in Jamshedpur FC an hneh a, team talbuai Blasters tan chuan result lawmawm bik a ni. Blasters tana Costa Nhamoinesu-a goal hmahruai chu Jamshedpur hian Nerijus Valskis-a freekick mawi bik hmangin an chhanglet - minute 66-naah a yellow card pahnihna avangin

Lalruatthara hnawhchhuah a ni zui a, Blasters dinhmun a chhe takzet. Mahse, South Indian club tan Jordan Murray chuan hun tawp hnaih lamah goal hnih a rawn khung a, Jamshedpur hian Valskis hmangin goal khat chu chhang ve leh mah se si phurh erawh an sut zo thei lo. 

Blasters tan  Gary Hooper chuan first half ṭantir lamah hun duhawm vawi hnih ngawt a nei a, Celtic striker hlui hian a chance neih ṭhat erawh goal-ah a chantir thei lo - Jamshedpur tan Jackichand Singh chuan bar a tih per a, Aizawl FC keeper hlui, Blasters si ban nghaktu Albino Gomes chuan Valskis-a khung tur nia lang chu ṭha takin a dang bawk. 

ṭ

Jamshedpur tan defender Ricky Lallawmawma chuan inkhel bul a ṭan a, William Lalnunfela chu minute 75-naah luhtir niin midfielder Isaac Vanmalsawma chu minute 87-naah a lut bawk. 

Blasters lamah Lalruatthara'n bul a ṭan a, mahse, Hmunhmelṭha tlangval hi hnawhchhuah a ni - a yellow card pahnihna erawh a nem hret niin a lang a, Ruatthara a vannei tawk lo.